Pas vdekjes së 27-vjeçarit mbrëmë në Lipjan, për të cilin pesë zyrtarë policorë janë arrestuar me dyshimin për “vrasje nga pakujdesia”, vëllau i të ndjerit ka dhënë një rrëfim të rëndë për momentet e para të ngjarjes tragjike dhe trajtimin nga institucionet.
“Pas orës 1 të mesnatës na kanë telefonuar dikush nga stacioni policor me ardhë në emergjencë shkaku i vllaut. Na e morëm si aksident edhe pse ke thirrje e policisë për me shku në emergjencë, s’o e lehtë e morëm pak si relaks. Nuk na informojë askush derisa hymë brenda te shtretërit aty ku shtrihen pacientët, e pamë një çarçafë mbi vëllaun tonë, me mua ke edhe babi, ai i pyeti: pse e keni vendosur këtë çarçafë? Tha: Ka ndërruar jetë. Në atë moment u përkeqësua situata edhe e babës edhe e imja. Sepse, ke shumë e papritur. Situata aty ke shumë e çuditshme. Lipjani nuk është qyteti i madh. Ne njihemi gati me të gjithë policët. Nuk u afrua asnjëri prej tyre. Kam pasur me shumicën raporte dhe i kam përshëndetur në rrugë. Nuk u afruan, s’na thanë as ngushëllime. U shmangën”, tha ai për Tëvë1.
Familjari rrëfen edhe për mënyrën e çuditshme të sjelljes së zyrtarëve policorë dhe mungesën e transparencës institucionale.
“Më vonë erdhën disa shokë të mi, ju thashë se s’po flasin, i pyeta se çfarë ju kemi bërë. Mënyra se si u shfaqën, nëse është nevoja ju kërkoj edhe falje institucionit të policisë nëse iu kam bërë problem edhe pse ka vdek. Nuk na kanë treguar pse ka vdekë, asgjë. Faktikisht me letra kështu na kanë treguar njëherë në ndikim të alkoolit, po pyetja se si ka vdekë, pastaj thanë infarkt, thash në rregull. Por, prapë në letra nuk merrsha asgjë… ish mbush policë aty nuk u dike a janë duke e ruajtur ndonjë kriminal a çka, nuk e kuptoj çka…”, tregoi ai.
Ai tregon për shenjat e dukshme në trupin e të ndjerit dhe mungesën e bashkëpunimit nga Instituti i Mjekësisë Ligjore.
“Kur e kem hapë kufomën e vëllait ka qenë i qarë në vetull, në kokë me brinjë të thyer. Autopsia nuk na kanë dorëzuar ende. Dje jemi shkuar bashkë me avokatin në IML nuk kanë pranuar me u paraqit mjekët apo çka janë ata… e kemi kërkuar edhe emrin e prokurores e kanë fshehur edhe atë. E gjetëm një, shkuam atje para orës 14:00, por thanë që ka ecë dhe s’është në punë”.
Fotografi të trupit të të ndjerit janë ruajtur nga familjarët, për çdo rast.
“Shenja ka pasur në gjithë trupin, unë i kam fotografitë që i kam bërë masi që e kemi marrë kufomën, në rast nevoje nëse vyjnë ndonjëherë unë i kam të ruajtura fotografitë”.
Në fund, pavarësisht dhimbjes dhe paqartësive, familjari thotë se vazhdojnë të kenë besim në institucionet.
“Nuk po dua me ngritë kurrfarë dyshimesh, na prapë vazhdojmë me besu në institucione tona. E di që ka njerëz të mirë aty. Uroj me dalë e vërteta, nëse jo nuk e di, ndoshta duhet me përdor instanca tjera”, tha ai.
Në lidhje me këtë rast, Policia e Kosovës njoftoi se janë arrestuar pesë zyrtarë policorë, të cilët dyshohen për veprën penale “vrasje nga pakujdesia”. Hetimet janë në zhvillim.
