Në një vendpunishte në rrugën “Isa Kastrati” në Prishtinë mesditën e së dielës ka pasur shembje dheu.
Lajmin për tëvë1.info e ka konfirmuar zëvendëskomandanti i Njësisë së Zjarrfikësve, Abdusamed Shkodra, i cili ka bërë të ditur se nuk ka të lënduar nga ky rast.
Shkodra ka thënë se të rrezikuara që nga shembja e dheut të binin në vendpunishte ishin katër vetura që kanë qenë të parkuara, tri prej të cilave është arritur të largohen.
Ndërkaq, sipas tij vetura tjetër më pak e rrezikuar, pritet të largohet nga automjeti për bartje.
“Sapo ka përfunduar intervenimi. Brigada ka pranuar lajmin në 12:09. Rasti ka ndodhur në rrugën “Isa Kastrati” në Prishtinë. Nuk është rrezikuar ndonjë banorë. Katër vetura kanë qenë të parkuara dhe ishin të rrezikuara që nga shembja e dheut të binin në vendpunishte. Tri nga to i kemi larguar, ndërsa një tjetër, më pak e rrezikuar, pritet që ta largojë automjeti për bartje”, ka thënë ai./teve1.info/
