Tritan Shehu, deputet i PD-së në Kuvendin e Shqipërisë, thotë se është kundër veprimeve, si ai që ka marrë kryeministri Edi Rama, duke i dorëzuar një draft të Asociacionit të Komunave me shumicë serbe BE-së dhe SHBA-së.
Në një lidhje direkte në “Info Nata” në Tëvë 1, Shehu theksoi se kjo është e rrezikshme për interesat e Kosovës, përkatësisht moskonsultimi me Qeverinë e Kosovës.
“Unë jam kundër veprimeve të tilla, sidomos në mënyrë të njëanshme, pa u konsultuar me Kosovën, me Qeverinë e Kosovës…unë mendoj që është e rrezikshme dhe krejtësisht në kundërshtim me interesat e Kosovës, që Rama të marri qëndrime paternaliste, t’i veshi vetes petkun e guvernatorit të Kosovës dhe t’i japi të drejta që askush nuk ia jep dhe atribute që realisht nuk mund t’i ketë ai në mënyrë absolute”, tha ai.
Deputeti shqiptar deklaroi se një veprim i tillë e zbeh sovranitetin e Kosovës.
“Unë e konsideroj të rrezikshme sepse kjo realisht zhvlerëson autoritetin e Kosovës, zhvlerëson dhe zbeh sovranitetin e Kosovës dhe në fund të fundit atë që do të bëjë Serbia dhe Vuçiqi për të zbehur sovranitetin e Kosovës, autoritetin e Kosovës, pavarësinë e Kosovës dhe për të treguar që Kosova nuk ka fuqi të qeveriset, Kosova nuk di të qeveriset vetë, Kosova është thjesht një nocion dhe asgjë më shumë. Por nuk është kështu, është krejt e kundërta. Kosova është shtet i pavarur dhe duhet respektuar totalisht si një shtet sovran, i pavarur”, shtoi Shehu.
Kryeministri Rama ka njoftuar se dje i ka përcjellur kancelarit gjerman, Olaf Scholz dhe presidentit francez, Emmanuel Macron një draft të Asociacionit, i cili sipas tij është punuar nga disa ekspertë të huaj. /Teve1.info/
