Presidentja e Komisionit Evropian, Ursula von der Leyen, është pyetur sot në lidhje me incidentin e fundit të balonave që kanë shkelur hapësirën ajrore të Lituanisë.
Ajo shprehu mbështetjen e plotë për Lituaninë, duke e cilësuar situatën si një akt provokues dhe kërcënim ndaj sigurisë së Bashkimit Evropian.
“Dëshiroj të shpreh solidaritetin tim të plotë me Lituaninë,” tha Von der Leyen, duke e quajtur këtë “një provokim, një kërcënim hibrid”, të cilin “nuk mund ta tolerojmë”.
Presidentja e Komisionit Evropian theksoi gjithashtu nevojën për të rritur gatishmërinë dhe investimet në fushën e mbrojtjes, përfshirë teknologjitë moderne si dronët, citon The Guardian.
Ajo tha se mbështet planet e BE-së për të forcuar kapacitetet ushtarake dhe për të siguruar që asnjë ndërhyrje e huaj të mos cënojë territorin e Unionit.
“Ne nuk do të tolerojmë asnjë ndërhyrje në hapësirën tonë ajrore ose në territorin tonë,” nënvizoi Von der Leyen.
