Kreu i agjencisë së OKB-së për refugjatët palestinezë (UNRWA) tha të premten se fëmijët në Rripin e Gazës po “vdesin urie” për shkak të bllokadës së ndihmës nga Izraeli, transmeton Anadolu.
“Gaza: fëmijët po vdesin urie. Qeveria e Izraelit vazhdon të bllokojë hyrjen e ushqimit dhe gjërave të tjera bazë. Një uri e shkaktuar nga njeriu dhe e motivuar politikisht. Pothuajse dy muaj rrethim. Thirrjet për të sjellë furnizime po lihen pa u dëgjuar”, shkroi Philippe Lazzarini në X.
Deklarata e tij vjen ndërsa Programi Botëror i Ushqimit (WFP) njoftoi se ka shpërndarë rezervat e fundit të ushqimit të mbetura në kuzhinat në Gaza.
Sipas agjencisë së OKB-së, enklava rrezikon të mbetet pa furnizime brenda ditësh.
Vendkalimet janë mbyllur që nga 2 marsi, duke bllokuar të gjitha ndihmat për më shumë se shtatë javë, që është mbyllja më e gjatë në historinë e Gazës.
Izraeli rifilloi sulmet në Gaza më 18 mars, duke i dhënë fund armëpushimit të janarit. Më shumë se 51.400 palestinezë, kryesisht gra dhe fëmijë, janë vrarë që nga tetori i vitit 2023.
Gjykata Ndërkombëtare Penale lëshoi urdhra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
