Sekretari i përgjithshëm i NATO-së, Mark Rutte ka bërë një udhëtim të befasishëm në Ukrainë për t’u takuar me presidentin ukrainas, Volodymyr Zelensky.
Këtë e ka bërë të ditur në një postim në mediat sociale, ku ka thënë se e ka siguruar Zelenskin se mbështetja e NATO-së mbetet “e palëkundur” dhe ndihma e aleancës do do të vazhdojë.
“Sot vizitova Odesën së bashku me Zelenskin. Populli i Ukrainës ka duruar kaq shumë – jo më pak sulmin e Rusisë të së Dielës së Palmës në Sumy. Mbështetja e NATO-s është e palëkundur”, ka shkruar Rutte në postim, raporton The Guardian.
Duke folur në Odesa, Rutte dënoi fuqishëm sulmin rus ndaj Sumy-t si “thjesht i egër” dhe “pjesë e një modeli të tmerrshëm të Rusisë që sulmon objektivat dhe infrastrukturën civile”.
Edhe presidenti ukrainas ka folur për vizitën dhe takimin në mediat sociale ku tha se dyshja “vizituan një spital ku mbrojtësit ukrainas po shërohen nga plagët e tyre” dhe folën me disa nga ushtarët.
Ai foli edhe për nevojën “akute” të vendit për sisteme dhe raketa të mbrojtjes ajrore, raportoi AFP.
Rutte ka komentuar edhe bisedimet për paqe mes Rusisë dhe Ukrainës, të cilat i ka quajtur “jo të lehta”.
“Këto diskutime nuk janë të lehta – jo më pak në vazhdën e kësaj dhune të tmerrshme – por ne të gjithë mbështesim shtytjen e presidentit Trump për paqe ”,
“Pra, më lejoni t’i them përsëri – popullit të Ukrainës: Ne qëndrojmë me ju. Dhe mezi presim një ditë që burrat dhe gratë e guximshme të këtij vendi të jashtëzakonshëm të mund të gëzojnë lirinë pa frikë,” tha ai.
