Vendimi i Presidentit amerikan, Donald Trump për të zhvendosur aeroplanmbajtësen më të përparuar të vendit në Amerikën e Jugut në fushatën e tij kundër karteleve të drogës po e tërheq anijen nga Deti Mesdhe në një kohë kur një armëpushim i brishtë midis Izraelit dhe Hamasit është kërcënuar nga sulmet e reja izraelite në Gaza.
SHBA-të pritet të jenë në një pozicion mjaft të pazakontë, duke pasur vetëm një aeroplanmbajtëse të vendosur dhe asnjë në ujërat e Evropës dhe Lindjes së Mesme, shkruan AP.
Ndryshimi është veçanërisht i dukshëm pasi SHBA -të iu bashkuan sulmeve izraelite ndaj Iranit në qershor dhe janë angazhuar në disa nga operacionet luftarake më intensive që nga Lufta e Dytë Botërore kundër Huthëve të Jemenit në Detin e Kuq.
Aeroplanmbajtëset, me mijëra marinarë dhe dhjetëra avionë luftarakë, janë njohur prej kohësh si një nga treguesit kryesorë të fuqisë ushtarake amerikane dhe prioriteteve të politikës së jashtme të vendit.
Që nga fillimi i luftës së Izraelit në Gaza më 7 tetor 2023, ka pasur pesë dislokime aeroplanmbajtëse në Lindjen e Mesme , duke përfshirë dy aeroplanmbajtëse në rajon në disa momente këtë vit dhe vitin e kaluar.
