Shtetet e Bashkuara kanë njoftuar se kanë pezulluar për një kohë të pacaktuar Dialogun Strategjik të planifikuar me Kosovën. Vendimi erdhi pas shqetësimeve lidhur me veprimet e qeverisë kujdestare, të cilat, sipas SHBA-së, kanë rritur tensionet dhe paqëndrueshmërinë, duke penguar bashkëpunimin produktiv mbi prioritetet e përbashkëta.
Në deklaratën e Ambasadës së SHBA-së në Prishtinë thuhet se, megjithë këtë pezullim, Uashingtoni mbetet i përkushtuar në avancimin e interesave të përbashkëta me popullin e Kosovës, të bazuara mbi paqen, stabilitetin dhe prosperitetin ekonomik.
“Fatkeqësisht, veprimet dhe deklaratat e fundit të Kryeministrit në detyrë Kurti kanë paraqitur sfida për përparimin e arritur gjatë shumë viteve,” thuhet në deklaratë.
Dialogu Strategjik ishte planifikuar të forconte lidhjet ekonomike dhe diplomatike mes dy vendeve. Shtetet e Bashkuara shprehën shpresën se në të ardhmen, në rrethana të përshtatshme, këto përpjekje do të mund të vazhdojnë.
