Ministri i Administrimit dhe Pushtetit Lokal, Elbert Krasniqi, i ka quajtur kërkesa të Beogradit, thirrjet e emisarit të ShBA-së Gabriel Escobar, që kryetarët e katër komunave në veri të Kosovës të dorëhiqen për t’i hapur rrugë zgjedhjeve të reja. Sipas Krasniqit, Beogradi ka qenë shkaktar që serbët nuk kanë marrë pjesë në zgjedhjet e fundit.
Një ditë para takimit në mes Prishtinës dhe Beogradit në Bruksel, temë kryesore kanë qenë zgjedhjet e parakohshme në veri të vendit.
Për këtë çështje ka folur edhe i dërguari special i ShBA-së për Ballkanin Perëndimor, Gabriel Escobar.
Sipas tij, dorëheqja e kryetarëve do ishte zgjidhje më pak e komplikuar për veriun.
“Nëse doni të keni zgjedhje të reja me pjesëmarrjen e serbëve, mendoj se dorëheqjet janë rruga më e shpejtë, më e lehtë. Peticioni si nismë nuk është provuar ndonjëherë më parë. Në fakt, nuk ekzistojnë shumë nga rregulloret dhe ligjet për këtë. Megjithatë, po kërkojmë për çfarëdo mundësie brenda Kushtetutës, që do të mundësonte mbajtjen e zgjedhjeve të reja. Po kërkojmë nga serbët që të marrin pjesë plotësisht në zgjedhje kur ato të vendoset të mbahen. Se si arrijmë deri aty, është çështje që do të diskutohet mes palëve. Por, gjithsesi besoj se dorëheqjet do të ishin më të shpejtat. Megjithatë, po e përcjellim situatën me shumë vëmendje”, ka deklaruar Escobar.
Por dorëheqjet nuk po shihet si rrugë e duhur për ministrin e administrimit të pushtetit lokal, Elbert Krasniqi.
Madje ai ka thënë që këto kërkesa janë të Beogradit.
“Udhëzimi administrativ është proces demokratik dhe gjithçka tjetër nuk është kërkesë e qytetarëve atje, por janë kërkesa të Beogradit. Ato nuk janë kërkesa në të mirë të qytetarëve”. “Largimi i tyre mund bëhet përmes formës që është shumë demokratike. Kush mund të garantojë që serbët do të marrin pjesë në zgjedhje nëse kryetarët japin dorëheqje? Për atë është e rëndësishme të kemi vullnet të qytetarëve për të marrë pjesë në zgjedhje”, u shpreh ministri i Administrimit të Pushtetit Lokal, Elbert Krasniqi.
Mirëpo ky peticion sipas ish anëtarit të Gjykatës Kushtetuese, Kadri Kryeziut është antikushtetues.
Kryeziu tregon se nëse shkojnë hapat sipas këtij udhëzimi, zgjedhjet e reja janë pas muajit shkurt të vitit 2024.
Ministria e Administrimit të Pushtetit Lokal ka bërë një udhëzim administrativ me të cilin përmes peticionit kërkon largimin e katër kryetarëve të komunave veriore.
