Shtetet e Bashkuara po punojnë me Kinën që të sigurohen që gara mes dy shteteve të mos shndërrohet në konflikt, tha një zyrtar i Shtëpisë së Bardhë më 27 gusht, teksa të dyja palët nisën bisedimet mbi raportet mes tyre që janë testuar gjatë presidencës së Joe Bidenit.
Jake Sullivan, këshilltar i sigurisë kombëtare në SHBA, do të zhvillojë takime dyditore me Wang Yi, zyrtarin e lartë të politikës së jashtme të liderit kinez Xi Jinping, në periferi të Pekinit.
“Presidenti Biden ka qenë shumë i qartë në bisedat e tij me presidentin Xi se ai është i përkushtuar për të menaxhuar këtë raport të rëndësishëm”, tha Sullivan për mediat para nisjes së takimeve.
Qëllimi i vizitës së tij është që të mbahet komunikimi në raportet mes dy shteteve që u prishën më 2022-23 dhe raportet janë përmirësuar vetëm pak muaj më vonë.
Nuk pritet që të ketë ndonjë njoftim të rëndësishëm nga këto takime, por takimet e Sullivanit mund të shtrojnë rrugën për mbajtjen e një samiti final mes liderit kinez, Xi Jinping, dhe presidentit amerikan, Joe Biden, para se presidentit amerikan t’i përfundojë mandati në janar.
Wang, drejtor i Zyrës Qendrore të Komisionit për Punë të Jashtme të Partisë Komuniste, tha se raportet Kinë-SHBA në vitet e fundit kanë pasur ulje-ngritje.
“Çelësi është që të mbahet respekti i ndërsjellë, bashkëjetesa paqësore dhe bashkëpunimi që u shkon për shtat të dyja palëve”, tha ai.
Administrata Biden ka pasur qëndrim të ashpër ndaj Kinës, të cilën e sheh si konkurrente strategjike, duke kufizuar qasjen e kompanive të saj në teknologjinë e avancuar dhe ka kundërshtuar fuqinë në rritje, teksa synon të ushtrojë ndikim mbi Tajvanin dhe Detin e Kinës Jugore.
Raportet, që nuk ishin të mira, u përkeqësuan edhe më shumë pasi kryetarja e atëhershme e Dhomës së Përfaqësuesve, Nancy Pelosi, vizitoi Tajvanin në gusht të vitit 2022. Shpresat për përmirësimin e raporteve u shuan pasi në shkurt, një balonë kineze e spiunazhit fluturoi mbi SHBA, para se të rrëzohej nga ushtria amerikane.
Sullivan ka qenë njeriu i deleguar nga Bideni i cili ka mbajtur disa biseda të paparalajmëruar me Wangun, i cili njëherësh është edhe ministër i Jashtëm i Kinës.
Gjatë takimit në maj të vitit të kaluar mes Sullivanit dhe Wangut, dy shtetet nisën një proces delikat të përmirësimit të raporteve. Që atëherë, dy zyrtarët janë takuar edhe dy herë, në Maltë dhe Tajlandë.
Ministria e Jashtme e Kinës gjatë kësaj jave tha se raportet me SHBA-në janë “në pikë kritike”. Ky institucion tha se të dyja palët po bisedojnë për klimën dhe çështje të tjera, por akuzoi SHBA-në se po vazhdon të kufizojë dhe shtypë Kinën./rel
