I dërguari amerikan për Ballkanin Perëndimor, Gabriel Escobar, ka kërkuar përsëri nga Kosova që të themeloi asociacionin.
Para Komitetit për Punë të Jashtme të Dhomës së Përfaqësuesve në Shtetet e Bashkuara, ai ka thënë se përmbushja e këtij obligimi, do të sillte një fushatë globale për njohjen e pavarësisë së Kosovës.
“Marrëveshja e Ohrit na ofron neve mundësinë më të madhe në 15 vjetët e fundit që të bashkëpunojmë me Qeverinë e Kosovës që të niset, jo vetëm një fushatë evropiane e njohjeve, por një fushatë globale e njohjeve. Shumica e shteteve do të dëshironin ta shihnin gatishmërinë e Kosovës që ta përmbushë pjesën e saj të marrëveshjes [së Ohrit], që është Asociacioni i komunave me shumicë serbe. Kjo është njëra prej arsyeve pse e kam shtyrë Qeverinë e Kosovës që ta çojë përpara këtë gjë – me mbështetjen amerikane – përmes një rruge që Asociacioni të mos e rrezikojë kushtetutën, apo strukturën ligjore, që të mund të nisim këtë vit fushatën e njohjeve. Deri më tani nuk e kam marrë atë zotim prej Qeverisë së Kosovës”, tha Escobar.
Njohësi i çështjeve politike Melazim Koci thotë se Qeveria duhet bëjë asociacionin që të filloi fushata amerikane për njohjen e pavarësisë së Kosovës.
Ndërsa, profesori universitar, Abit Hoxha, thotë se premtimi i Escobarit duhet të lexohet në kuadër të vazhdimit të angazhimit amerikan për Kosovën.
Në mesin e benefiteve që janë premtuar për Kosovën, pas zbatimit të marrëveshjes për normalizim ka qenë edhe anëtarësimi në NATO dhe mekanizma të tjerë ndërkombëtarë.
