Përfaqësuesja e SHBA-së, është kualifikuar në gjysmëfinale të Kampionatit Botëror të basketbollit. Amerikanët avancuan në gjysmëfinale, pasi në ndeshjen çerekfinale triumfuan bindshëm ndaj Italisë. Në duelin e luajtur të martën në Manila të Filipineve, SHBA-ja triumfoi me rezultatin e thellë 100:63.
Për SHBA-në, kjo është fitorja e pestë në gjashtë ndeshje të luajtura në këtë turne, ndërsa në gjysmëfinale do të përballet me fituesin e çerekfinales tjetër ndërmjet Gjermanisë dhe Letonisë që zhvillohet të mërkurën. Ndaj Italisë, SHBA-ja ishte superiore prej fillimit të ndeshjes.
Dy çerekët e parë, i fitoi me të paktën 10 pikë epërsi, ndërsa shkëputjen e madhe e bëri në çerekun e tretë, i cili u mbyll me shifrat 37:20.
Italia e fitoi çerekun e fundit 19:17, por kjo nuk mjaftoi për ta evituar humbjen e thellë nga amerikanët. Mikal Bridges ishte më efikasi te SHBA-ja, me 24 pikë e 7 kërcime, ndërsa me lojë të mirë u veçua edhe Tyrese Haliburton që pati 18 pikë, 4 kërcime e 5 asistime. Tek Italia, Simone Fontecchio ishte më i dalluari edhe në këtë ndeshje, duke realizuar 18 pikë e 5 kërcime. Të martën, në gjysmëfinale të Botërorit ka avancuar edhe Serbia që e mposhti Lituaninë me rezultatin 87:68. Ndeshjet gjysmëfinale të Botërorit, do të zhvillohen të premten, po ashtu në Manila të Filipineve.