SHBA-të dhe Ukraina nënshkruan të mërkurën një marrëveshje që i jep amerikanëve akses në burimet e mëdha minerale të Ukrainës, duke finalizuar një marrëveshje të hartuar muaj më parë.
Të dyja palët ofruan vetëm detaje të thjeshta rreth strukturës së marrëveshjes, të cilën e quajtën Fondi i Riinvestimit Shtetet e Bashkuara-Ukrainë.
Por pritet që ai t’i japë SHBA-së akses në mineralet e çmuara të tokës së rrallë të Ukrainës , ndërsa i jep Kievit një masë sigurie për mbështetjen e vazhdueshme amerikane në luftën e saj të ashpër me Rusinë, raporton AP.
“Kjo marrëveshje i sinjalizon qartë Rusisë se administrata Trump është e përkushtuar ndaj një procesi paqeje të përqendruar në një Ukrainë të lirë, sovrane dhe të begatë në planin afatgjatë”, tha Sekretari i Thesarit Scott Bessent në një deklaratë.
“Presidenti Trump e parashikoi këtë partneritet midis popullit amerikan dhe popullit ukrainas për të treguar angazhimin e të dyja palëve për paqe dhe prosperitet të qëndrueshëm në Ukrainë.”
Nënshkrimi vjen dy muaj pasi një marrëveshje e ndryshme, por e ngjashme, pothuajse u nënshkrua përpara se të dështonte në një takim të tensionuar në Zyrën Ovale ku morën pjesë Presidenti Donald Trump, Zëvendëspresidenti, JD Vance dhe Presidenti ukrainas Volodymyr Zelensky.
Trump tha të mërkurën në mbrëmje në NeësNation se marrëveshja, “në teori”, do të thotë që SHBA-të do të marrin më shumë nga Ukraina sesa kanë kontribuar. “Doja të isha i mbrojtur”, tha ai, duke shtuar se nuk donte të dukej “budalla” duke mos marrë paratë mbrapsht për investimin.
