Një i dërguar i SHBA-së deklaroi të hënën se Uashingtoni ka dyfishuar mbështetjen për qeverinë e re në Siri, duke theksuar se nuk ka një “Plan B” përveç bashkëpunimit me autoritetet aktuale për të unifikuar vendin, i cili prej pothuajse 14 vitesh përjeton një luftë civile dhe së fundmi është goditur nga një valë e re dhune sektare.
Duke mbajtur një qëndrim kritik ndaj ndërhyrjes së fundit të Izraelit në Siri, ai e cilësoi atë të papërshtatshme dhe i komplikoi përpjekjet për stabilizimin e rajonit.
Tom Barrack, ambasadori amerikan në Turqi dhe i dërguari special për çështjet siriane – i cili gjithashtu ka një rol të përkohshëm në Liban – i bëri komentet në një intervistë ekskluzive për Associated Press gjatë një vizite në Bejrut.
Ai foli pas më shumë se një jave përleshjesh në provincën jugore të Sweidës midis milicive të pakicës fetare druze dhe fiseve lokale beduine sunite.
Forcat qeveritare siriane ndërhynë fillimisht për të rivendosur rendin, por më pas u mbështetën tek beduinët përpara se të tërhiqeshin sipas një marrëveshjeje armëpushimi me grupet druze.
Gjatë luftimeve janë vrarë qindra persona, ndërsa disa njësi të ushtrisë siriane dyshohet se kanë vrarë civilë druze dhe kanë djegur apo plaçkitur shtëpitë e tyre.
Ndërkohë, Izraeli ndërhyri ushtarakisht javën e kaluar në mbështetje të druzëve – një pakicë që konsiderohet besnike ndaj shtetit izraelit dhe që shpesh shërben në forcat e tij të armatosura.
Izraeli kreu dhjetëra sulme ajrore ndaj konvojeve të ushtrisë siriane në Sweida dhe gjithashtu goditi selinë e Ministrisë së Mbrojtjes në Damask.
Gjatë fundjavës, Barrack bëri të ditur arritjen e një armëpushimi mes Sirisë dhe Izraelit, pa dhënë detaje të mëtejshme.
Forcat qeveritare siriane janë ridislokuar në Sweida për të parandaluar shpërthimin e mëtejshëm të dhunës mes komuniteteve druze dhe beduine, ndërsa evakuimi i civilëve nga të dyja palët ishte planifikuar të fillonte të hënën./teve1/
