Propozimi legjislativ, i lëshuar të enjten në mëngjes, do t’i paraqitet Kongresit për shqyrtim.
Masat do ta bënin më të lehtë për SHBA-në sekuestrimin dhe shitjen e pasurive të oligarkëve dhe përdorimin e fondeve “për të korrigjuar dëmet e agresionit rus”.
Legjislacion i ngjashëm amerikan u miratua kohët e fundit, por kjo shënon një përshkallëzim.
Aleatët perëndimorë, përfshirë vendet anëtare të Bashkimit Evropian, kanë punuar së bashku që nga marsi për të gjurmuar asetet e elitave ruse, nga veprat e artit dhe pasuritë e paluajtshme deri te helikopterët dhe jahtet.
Sipas Shtëpisë së Bardhë, SHBA-ja tani ka sanksionuar dhe bllokuar anije dhe avionë me vlerë mbi 1 miliard dollarë, ndërsa BE-ja ka ngrirë kolektivisht mbi 30 miliardë dollarë.
Por planet e reja të paraqitura nga administrata shkojnë më tej, duke bërë thirrje për një bashkëpunim të efektshëm ndërinstitucional midis Departamentit të Thesarit, Departamentit të Drejtësisë, Departamentit të Shtetit dhe Departamentit të Tregtisë, raporton KP.
Presidenti Biden do të përcaktojë detajet të enjten në mëngjes në SHBA.
Paketa do të “krijojë autoritete të reja për konfiskimin e pronave të lidhura me kleptokracinë ruse, do të lejojë qeverinë të përdorë të ardhurat për të mbështetur Ukrainën dhe për të forcuar më tej mjetet përkatëse të zbatimit të ligjit”, tha Shtëpia e Bardhë në një deklaratë.
Ai vjen së bashku me një kërkesë që Kongresi të miratojë më shumë ndihmë ushtarake, ekonomike dhe humanitare për Ukrainën.
Javën e kaluar, presidenti Biden autorizoi një paketë të dytë ndihme ushtarake prej 800 milionë dollarësh si dhe 500 milionë dollarë ndihmë të drejtpërdrejtë ekonomike.
Shtetet e Bashkuara kanë lëvizur shpejt për të ndihmuar Ukrainën që nga fillimi i luftës në fund të shkurtit. Kjo përfshinë:
- Lëshimi i 3.7 miliardë dollarëve në totalin e ndihmës ushtarake dhe të sigurisë
- Vendosja e më shumë se 100.000 trupave në vendet anëtare të NATO-s në Evropë
- Vendosja e sanksioneve ekonomike, ngrirja e aseteve dhe ndalimi i udhëtimit për qindra oligarkë dhe politikanë rusë
- Vendosja e sanksioneve ndaj bankave ruse dhe subjekteve mbrojtëse
- Bllokimi i bankave kryesore ruse nga sistemi i mesazheve Swift
- Ndalimi i importit të naftës ruse
- Ndalimi i përdorimit të hapësirës ajrore të brendshme nga avionët rusë
Të martën, sekretari i Mbrojtjes i SHBA-së, Lloyd Austin mblodhi gati 40 vende në Gjermani dhe njoftoi se disa po rritnin mbështetjen e tyre për Ukrainën në mënyrë që “të lëviznin me shpejtësinë e luftës”.
“Ukraina ka nevojë për ndihmën tonë për të fituar sot. Dhe ata do të kenë ende nevojë për ndihmën tonë kur të përfundojë lufta,” u tha ai pjesëmarrësve.
Qeveria e Kanadasë propozoi gjithashtu legjislacionin këtë javë që do ta lejonte atë të sekuestronte dhe të shiste asetet ruse, transmeton BBC.
