E si pasojë e kësaj, Shatri tha se të dyja palët kanë marrë vendime të njëanshme, prandaj sipas tij, ato vendime nuk janë respektuar nga anëtarësia e SBASHK-ut.
“Që pas përfundimit të grevës, nuk është mbajtur asnjë takim nga SBASHK-u me Ministrinë e Arsimit, pra nuk janë takuar fare për diskutuar rreth çështjeve aktuale. Po ashtu, kanë marrë vendime të njëanshme e të cilat momentalisht nuk do të respektohen nga anëtarësia e SBASHK-ut”, tha Shatri në emisionin “Këndi i Debatit”.
Ndërkaq më tej, Shatri bëri të ditur se edhe Ligji për Paga është ende në diskutim publik.
“Edhe pse koha ka përfunduar, Ligji për Paga është ende në diskutim publik. Jemi të ftuar në një grup pune nga Ministria e Punëve të Brendshme ku kemi diskutuar rreth atyre propozimeve që i kemi dërguar. Ne fillimisht nuk jemi pajtuar me koeficientet e vendosur për të gjitha sektorët që kemi anëtarësi, që nga çerdhet deri te universitetet si dhe pjesa e kulturës”, tha tutje ai.
Kujtojmë se Bashkimi i Sindikatave të Pavarura të Kosovës, para disa ditësh ka vendosur t’i japë fund grevës së nisur më 25 gusht ku fillimisht u mbyllën kopshtet, ndërsa për katër javë rresht nuk u mbajt as mësimi nëpër shkollat fillore e të mesme./Tëvë1.info/
