Xherdan Shaqiri po vazhdon të shfaqet në nivel të lartë dhe kjo ka bërë që në Zvicër të ketë diskutime për mundësinë e kthimit të tij në përfaqësuese. Shaqiri i dha fund karrierës te Zvicra në verën e kaluar, pas Kampionatit Evropian të futbollit. Më pas u kthye te Baseli nga SHBA-ja dhe po e udhëheq këtë skuadër drejt titullit të kampionit.
Të hënën 33-vjeçari realizoi gol dhe tri asistime në një fitore 5:0 të Baselit. Ishte ndeshja e xhiros së fundit të pjesës së rregullt të kampionatit. Në plejof janë edhe pesë xhiro të tjera, ndërsa Baseli pritet shpejt ta konfirmojë titullin.
Shaqiri tani i ka 14 gola dhe 17 asistime në 29 paraqitje kampionale për Baselin. Por kthimi te Zvicra nuk është opsion për të, me gjithë diskutimet e fundit.
“Ekipi nacional nuk është çështje për mua”, ka thënë për televizionin zviceran fituesi i dyfishtë i Ligës së Kampionëve. Shaqiri ka lënë të kuptohet se do të fokusohet plotësisht te sukseset me Baselin.
Sajti i njohur zviceran, “20 Minuten”, ka shkruar se në 17 ligat më të mira evropiane vetëm Mohamed Salah i Liverpoolit rivalizon Shaqirin për shifrat e këtij edicioni. Ylli nga Egjipti, Salah, i ka 27 gola e 18 asistime në 33 ndeshje. Sipas këtij mediumi, nuk është befasuese që shumë njerëz kanë pyetur nëse Shaqiri do të kthehet te Zvicra, pas formës që e ka shfaqur së fundi. Pas pensionimit të Shaqirit, Zvicra ka pasur telashe të mëdha për të arritur rezultate pozitive. Ai e ka përfunduar karrierën me 125 paraqitje për Zvicrën.
“Jam shumë i kënaqur se si janë gjërat për momentin”, ka thënë Shaqiri.
Baseli e fillon plejofin me epërsi prej gjashtë pikësh ndaj përcjellësit të parë.
“Ne e marrim secilën ndeshje me shumë seriozitet. Qartë se qëllimi ynë është të bëhemi kampionë”, thotë ish-futbollisti i Bayernit, Interit e Liverpoolit.
Baseli, që po e pret titullin prej vitit 2017, është edhe në gjysmëfinale të Kupës. Pas katër ditësh përballet me Lausannen. Finalja është më 1 qershor.
“Shaqiri ka edhe një tjetër rekord në mendje. Ai është vetëm tri asistime larg rekordit të Miroslav Stevanoviqit prej 20 asistimeve. Duket një e arritur reale për Xhaqirin në topformë”, shkruan “20 Minuten”.
