Në Prizren ka nisur një iniciativë humanitare që do t’u ndryshojë jetën dhjetëra familjeve.
Komuna e Prizrenit, në bashkëpunim me organizatën “Jetimat e Ballkanit” të udhëhequr nga Halil Kastrati, ka filluar projektin për ndërtimin e 50 shtëpive të reja për familjet që jetojnë në kushte të vështira.
Kryetari i Prizrenit, Shaqir Totaj, tha se ky është shembulli më i mirë i bashkëpunimit mes institucioneve dhe organizatave humanitare.
“Prizreni gjithmonë ka treguar zemër të madhe. Sot po e dëshmojmë se asnjë familje nuk do të harrohet. Me Halil Kastratin dhe organizatën ‘Jetimat e Ballkanit’, po ndërtojmë jo vetëm shtëpi – por 50 histori të reja jete.”
Totaj shtoi se humanizmi është pjesë e identitetit të qytetit.
“Ky është solidariteti që e mban Prizrenin gjallë. Do të punojmë që çdo familje e ndershme të ketë një vend të sigurt për të jetuar.”
Nga ana tjetër, drejtuesi i organizatës “Jetimat e Ballkanit”, Halil Kastrati, u shpreh mirënjohës për mbështetjen e Komunës së Prizrenit, duke e cilësuar këtë bashkëpunim si “një shembull frymëzues të unitetit për të mirën e përbashkët”.
Projekti do të realizohet në disa faza, dhe përfundimi i tij do të sjellë strehim të qëndrueshëm për dhjetëra familje prizrenase që për vite me radhë kanë jetuar në pasiguri. /teve1.info/
