Në një lidhje direkte në “Info Nata” në Tëvë 1, Shala tha se mendon që Policia e Kosovës ka ndërmarrë të gjitha masat e duhura për të kontrolluar turmat.
“Është shumë e logjikshme që këto dy protesta mund të gërshetohen me njëra-tjetrën dhe në sheshin e Prishtinës mund të kemi një numër shumë më të madh të qytetarëve, të cilët nuk është larg mendjes që mund të ketë edhe persona apo individë të cilët nuk e përfillin rregullat e iniciatorëve të protestës, dhe mund të ketë një tentativë për të eskaluar. Por unë mendoj se Policia e Kosovës ka paraparë çdo mundësi të mundshme sa i përket mbarëvajtjes dhe kontrollit të turmave të caktuara të cilat mund të paraqiten në hyrje të objekteve, siç është Kuvendi, Qeveria dhe Presidenca”, tha Shala.
Shala tregoi edhe masat preventive institucionale të cilat mund të mirren.
“Qeveria duhet të ndërmarrë veprime konkrete, si është mbledhja qeveritare nesër në orët e para të mëngjesit dhe në vazhdim në procedurë të mëtutjeshme një seancë të jashtëzakonshme për të futur në rend të ditës leximin e dytë të Ligjit për paga dhe atë për të futur pjesëtarët më të shenjtë që janë veteranët e luftës”, tha ai.
Pas miratimit në parim të Projektligjit për pagën minimale dje në Kuvend, veteranët e UÇK-së kanë bërë thirrje për protestë, si shkak i mospërfshirjes së tyre në ngritjen e pagës minimale.
Ndërkaq, punëtorët e Korporatës Energjetike të Kosovës (KEK) do të protestojnë për votimin e Projektligjit për tërheqjen e mjeteve financiare nga Trusti Pensional. /Teve1.info/
