Asdren Shala nga Partia Socialdemokrate (PSD) ka thënë se Partia Demokratike e Kosovës (PDK) dhe Lidhja Demokratike e Kosovës (LDK) nuk kanë qëndrime të tyre politike, por veprojnë varësisht nga situatat.
Ai tha se i vije mirë që nuk kanë pranuar takimin me presidenten, Vjosa Osmani, por se do të kishte dëshirë që këtë ta bënin për arsye parimore dhe jo elektorale.
“Ky nuk është botëkuptim ideologjik apo parimor, kjo është ndjekje e politikave ditore nga po ec situata se këta nuk kanë qëndrim. As PDK, as LDK nuk kanë qëndrim. Këndej thonë jemi për Asociacionin, e mbështesin qeverinë më shku në veri, kur e shohin që ndërkombëtarët po e krijojnë qeverinë që ka shkuar në veri këta bëhen kundër qeverisë. Këta nuk kanë qëndrime, këta ecin ka po anon më shumë forca, pra ka ju del më mirë elektoralisht. Pra mirë që po mungojnë atje ( takimin e thirrur nga Osmani), por kisha pas dëshirë me bë për arsyeje ideologjike dhe parimore dhe jo për motive elektorale që janë banale”, tha ai në emisionin “Ditari” më Tëvë 1.
Ndryshe, Osmani dje ka shprehur keqardhje për partitë opozitare që kanë refuzuar ftesën e saj për takim.
“Presidentja ka shprehur keqardhje që partitë e tjera opozitare kanë refuzuar mundësinë që ta japin kontributin e tyre për çështje të interesit nacional, përfshirë përpjekjet për fuqizimin e aleancave strategjike e ekzistenciale të Republikës së Kosovës me partnerët, e në veçanti me Shtetet e Bashkuara të Amerikës. Ajo ka ritheksuar, se në përputhje me Kushtetutën do të vazhdojë të angazhohet në përfaqësimin e unitetit qytetar, mbrojtjen e kushtetutës, ruajtjen dhe fuqizimin e aleancave strategjike, sikurse edhe krijimin e një klime konstruktive për t’i adresuar sfidat dhe çështjet e rëndësishme në Republikën e Kosovës.” – thuhet në njoftim.
