Me kryeministrin Albin Kurti në pushtet, veriu i Kosovës do jetë i pakthyeshëm. Vlerësoi kështu Asdren Shala nga Partia Socialdemokrate e Kosovës.
Madje sipas tij, nëse propozimi franko-gjerman do të pranohet, atëherë do të ketë vetqeverisje për veriun.
“Publikisht Qeveria Kurti thotë se Kosova është parajsë, veç qytetarët janë duke e jetuar ferrin. Qeveria e Kosovës praktikisht nuk e ka veriun në kontroll. Me Kurtin në pushtet, veriu është çështje e pakthyeshme. Nëse pranohet plani franko-gjerman, ka një vetqeverisje për veriun. Me aq sa e njohim si strukturë planin franko-gjerman, veriu do të ketë status të veçantë. Kurtit i duhet sa më shumë kohë për të bërë propagandë, fushatë”, deklaroi Shala në emisionin “Ditari” në Tëvë1.
Ndërkaq, sa i përket planit franko-gjerman, Shala tha se ky propozim është rezultat i paaftësisë së Qeverisë Kurti.
“Plani franko-gjerman, është rezultat ekskluziv i kësaj Qeverie. Ky plan ka ardhur nga një paaftësi e Qeverisë Kurti. Planin franko-gjerman Qeveria Kurti nuk e ndalë dot, kjo për shkak se është e shantazhuar dhe e pafuqishme”, tha tutje ai.
Derisa shtoi se 6 kushtet e Kurtit për pranimin e Asociacionit, janë veçse lojëra fjalësh./teve1.info/.
