Deputeti i Partisë Demokratike të Kosovës, Ferat Shala, thotë se nëse kryeministri i Kosovës, Albin Kurti, do të ishte koordinuar me ndërkombëtarët, sot Kosova nuk do të kishte sanksione.
Shala, thotë se Kurti po të kishte koordinim me Shtetet e Bashkuara të Amerikës, gjendja e sigurisë në veri nuk do të ishte e njëjtë.
“Unë nuk e besoj që po koordinohet me ndërkombëtarët, po të ishte koordinuar, sot nuk do të kishim sanksione, po të ishte koordinuar me ndërkombëtarët nuk do të kishte nevojë që ambasadori Hovenier dhe të tjerët të lëviznin brenda murit nga tri e katër herë në Kosovë dhe të jepnin deklarata ditore. Po të ishin koordinuar me Kosovën nuk do të kishim bllokim të fondeve mbi 360 milionë të Bashkimit Evropian, po do të kishim koordinim me Shtetet e Bashkuara sot, nuk do ta kishim situatën e sigurisë çfare e kemi në veri. Po të kishim koordinim me partnerët, kryetarët e komunave nuk do t’i kishim të barrikaduar duke u ruajtur nga Njësitë Speciale të vendit, po të kishte koordinim, Albin Kurti do të kishte koordinim edhe me faktorin e brendshëm situata nuk do të vinte deri këtu që ai mos me guxu me bë publike marrëveshjen që është determinuese për fatin e popullit të Kosovës”, tha ai në emisionin “Info Nata” në Tëvë1.
Ai tha se për këtë situatë të tanishme të Kosovës, Kurti është jashtë lojës institucionale.
“Në këtë situatë ai është krejtësisht jashtë lojës institucionale dhe përgjegjësisë politike që ka në raport me shtetin”./teve1.info/
