Para dy javësh, gjykimi ndaj tyre u shtye.
Bedri Shabani dhe Muharrem Qerimi u ankuan se aktakuzën e pranuan me vonesë.
Të hënën, dy shqiptarët që po akuzohen për spiunazh, ishin gati që të deklarohen për fajësinë.
Përkundër shumë provave të prezantuara nga Prokuroria në aktakuzë, Shabani dhe Qerimi e mohuan se dhanë informacione dhe dokumente për BIA-s serbe lidhur me UÇK-në, eprorët e pjesëtarët e saj, si dhe për institucionet e ndjeshme të sigurisë si për Policinë, AKI-në e IPK-në.
“Jam i pafajshëm”, ka deklaruar Shabani.
“Nuk e pranoj fajësinë për veprën penale, spiunazhi”, ka deklaruar Qerimi.
Ndryshe Shabani, ndaj Muharrem Qerimit, përveç spiunazhit akuzohet edhe për armëmbajtje pa leje.
Në shtëpinë e tij gjatë bastisjes, Policia kishte sekuestruar një revole, një karikator dhe dhjetëra fishekë.
“Kurse për armëmbajtje pa leje, e pranoj fajësinë”, ka deklaruar Qerimi.
“Pranimi i fajësisë bazohet në provat materiale që gjenden në shkresat e lëndës dhe pranimi i fajësisë bëhet pas konsultimit paraprak me mbrojtësin. Kështu që, i propozoj Gjykatës që të aprovohet ky pranim fajësie, për sa i përket veprës penale, armëmbajtje pa leje”, tha avokati i Qerimit, Betim Shala.
Dakordim për pranim të fajësisë, pati edhe nga prokuroria.
“Prokuroria konsideron se ky pranim fajësie duhet të pranohet dhe i propozon Gjykatës që të merr aktvendim për pranimin e fajësisë, meqë ky pranim fajësie është në përputhje me dispozitat procedurale”, tha prokurori, Fikrije Zejnullahu.
“Miratohet pranimi i fajësisë nga i akuzuari, Muharrem Qerimi, për veprën penale armëmbajtje pa leje”, ka kryetari i Trupit gjykues, Rrahman Beqiri.
Me deklarimin për fajësinë, seanca e sotme ndaj Shabanit dhe Qerimit ka përfunduar.
Mirëpo procesi pritet të jetë i gjatë.
Ndaj tyre rëndon një aktakuzë voluminoze.
Në një pjesë të saj tregohet se si Bedri Shabani ia transmetonte informacionet zyrtarit të lartë të BIA-s, Sërgjan Rosiç, i cili ishte përgjegjës për Regjionin e Pançevës, si dhe kolonelit tjetër serb Bogoljub Janiçeviq, ish-komandant i Policisë së Serbisë për regjionin e Ferizajt gjatë kohës së luftës. Janiçeviq kishte qenë gjithashtu edhe udhëheqës i operacionit policor-ushtarak në masakrën e Reçakut.
