Shefi i grupi parlamentar të Partisë Demokratike të Kosovës, Abelard Tahiri, pas përfundimit të sesionit pranveror të Kuvendit, ka fajësuar mazhorancën për dështim të disa seancave.
Tahiri, është shprehur se ky sesion i Kuvendit ashtu si filloi edhe u përmbyll, me 30 pika të papërfunduara.
“Sesioni pranveror ka filluar në fund të janarit me 30 pika të papërfunduara të sesionit vjeshtor. Po ashtu po e përmbyllim këtë sesion me 30 pika të papërfunduara. Mund të them se punë efektive kanë qenë tre muaj e gjysmë, për shkak të dështimit të njëpasnjëshëm të seancave. Gjatë këtij sesioni grupi parlamentar i PDK-së ka iniciuar katër komisione hetimore. Vetëm njërin prej tyre kemi arritur ta themelojmë”, ka deklaruar ai në konferencë për media.
Gjithashtu, Tahiri foli edhe për punën e kësaj partie gjatë këtij sesioni, duke përmendur dërgimin e disa ligjeve në Kushtetuese.
“Si grup parlamentar i PDK-së gjatë sesionit pranveror kemi fituar betejën që ka të bëjë me Byronë për Konfiskim të Pasurisë që binte në kundërshtim me rendin kushtetues. Ne i kemi nisur edhe dy beteja tjera kushtetuese atë për Këshillin e Pavarur për Media dhe Këshillin Prokurorial të Kosovës”, ka thënë deputeti i PDK-së./teve1.info/
