Kuvendi nuk miratoi projektligjin i cili rregullon çmimin e barnave, pasi nuk mori mbështetjen e partisë në pushtet, megjithëse u diskutua gjatë rreth tij.
Inicuesja e këtij projektligji, deputetja Floretë Zejnullahu iu drejtua deputetëve të Vetëvendosjes duke iu thënë se lidhja e tyre me kompanitë farmaceutike i pengon ata të votojnë pro.
“Ua përkujtoj që asnjë lloj lidhje me oligarkët nuk e kam, Arben Vitinë e keni punësuar tek oligarkët, ju e keni shitë heroin e pandemisë, ju jeni të shitur të oligarkët”, tha ajo.
Projektligjin nuk e pranoi as ministri i shëndetësisë, Rifat Latifi i cili tha se një të tillë Qeveria do ta sjell për votim në vjeshtë.
“Në realitet projektligji për barnat ka mbaruar, është i kryer, është jashtëzakonisht i mirë dhe ju keni me pas shansin të shtoni diçka, me heq diçka, por sigurisht do ta keni shansin ta bëjmë ligjin më të mirë”, tha Latifi.
Si urgjente çështjen e rregullimit të çmimit të barnave e vlerësuan edhe dy partitë tjerë opozitare LDK dhe AAK, të cilat edhe kërkuan votimin në parim të projektligjit.
“Neve e përkrahin si të tillë dhe do ta japim kontributin nëse e merr votën, që do të duhej ta merrte”, tha deputeti i LDK-së, Armend Zemaj.
“E ftoj Vetëvendosjen të miratojë nismën legjislative të Partisë Demokratike e cila kërkon rregullim dhe shumica e neneve të parashtruara këtu janë në vijë të plotë me diskutimet që u thanë”, u shpreh Besnik Tahiri, shef i deputetëve të AAK-së.
Por opozitës Vetëvendosje i kërkoi llogari pse këtë çështje nuk e rregulluan për 20 vjet sa ishin në pushtet.
“Pse nuk e rregulluat për dy dekada çështjen e çmimit të barnave dhe pajisjeve dhe produkteve medicinale”, tha deputeti i Vetëvendosjes Besim Muzaqi.
Ndaj kësaj deklarate reagoi deputeti i PDK-së, Bekim Haxhiu i cili mori përgjigje nga kryeparlamentari, Glauk Konjufca.
Gjatë seancës së sotme, Kuvendi e shtyu për javën e ardhshme e projektligjin për financimin e partive politike, pasi i njëjti nuk është shqyrtuar ende në komisionin parlamentar për komunitete.
Ndërkaq, Kuvendi i Kosovës nuk ka miratuar as Projektligjin për shëndetësinë të iniciuar nga Lidhja Demokratike e Kosovës.
Vetëm 17 deputetë opozitarë votuan pro këtij projektligji, ndërsa 40 deputetë të Lëvizjes Vetëvendosje votuan kundër, derisa katër prej tyre, abstenuan, në mesin e të cilëve sërish ishte kryetari i Kuvendit, Glauk Konjufca.
Pas kësaj pike, Kuvendi mbylli punimet e seancës plenare, pasi partitë opozitare lëshuan sallën.
Raporti i gazetares Flaka Zogu.
