Edhe seanca e së premtes në Kuvendin e Kosovës pati të njëjtin epilog sikurse mbledhjet paraprake të të zgjedhurve të popullit.
Pas dështimit të konstituimit, opozita ritheksoi kërkesën se partia fituese duhet ta ndërroj kandidatin për postin e kryetarit të Kuvendit.
Kryetari i Partisë Demokratike të Kosovës Memli Krasniqi, ka kritikuar Lëvizjen Vetëvendosje për bllokimin institucional,
“Duhet të propozohet një kandidat që ka shumicën e votave në Kuvend. Dihet që Albulena Haxhiu nuk i ka dhe nuk do t’i ketë ato vota. Vetëvendosja duhet ta ndërrojë kandidaten”, tha Krasniqi.
Kryetari i Lidhjes Demokratike të Kosovës (LDK), Lumir Abdixhiku, ka mbrojtur idenë e partisë së tij për krijimin e një qeverie tranzicionale, duke e cilësuar si të vetmen zgjidhje gjithëpërfshirëse që është dhënë në rrethanat aktuale.
Megjithatë deputetja e Lëvizjes Vetëvendosje, njeherit bashkekryetarja e Listes Guxo, Donika Gërvalla, është shprehur optimiste se ka njerëz në LDK që do ta rrisin presionin ndaj kryetarit Lumir Abdixhiku që të ndërrojë qëndrim karshi LVV-së dhe të pranojë ftesat e tyre për bashkëpunim.
“Dua ta besoj, brenda LDK-së dhe jashtë saj, ka ende njerëz që mendojnë përtej interesit personal, do ta rrisin presionin nga kryetarit Abdixhiku që LDK-ja të bëjë lëvizje pozitive në të mirë të Kosovës”, tha Gërvalla.
Derisa kreu i AAK-së, Ramush Haradinaj, bëri të ditur se do i drejtohet Kushtetueses për vendimet e marra së fundi në Kuvendin e Kosovës.
Kurse lideri i Nismës Socialdemokrate, Fatmir Limaj, ka kërkuar që sa më shpejtë të zgjidhet ky ngërç politik.
“Po shpresoj që po harxhohen gjitha këto mundësi, eksplorime që janë duke i bërë forcat politike, momenti është me i thirr përgjegjësisë, të gjithë duhet të kuptojnë se institucionet kosovare urgjent duhet me i pas, bota, rajoni rreth neve është në trazim. Kosova nuk e ka luksin të vazhdojë të mbetet kështu sa më shpejt na duhen institucionet”, tha Limaj.
Përpjekja për të konstituuar institucionin legjislativ të Republikës së Kosovës ka nisur me 15 prill.
