Sulmuesi i Ballkanit, Valentin Serebe është shpallur futbollisti më i mirë i xhiros së fundit në Superligën e Kosovës në futboll.
Federata e Futbollit të Kosovës (FFK), ka bërë të ditur të martën, se Serebe e ka fituar çmimin “Ylli i Javës” që ndahet pas përfundimit të secilës xhiro në Superligë.
Komisioni i Veteranëve të futbollit, ka konstatuar se Serebe ishte më i miri, falë paraqitjes fantastike në fitoren e Ballkanit në udhëtim ndaj Ferizajt me rezultatin 3:1.
Serebe në këtë fitore, që ishte edhe e para për Ballkanin këtë sezon pas dy barazimeve, kontribuoi me dy gola.
“Fillimisht, gjëja më e rëndësishme ishte të fitonim dhe pastaj, me ndihmën e Zotit, arritëm fitoren. Shënova dy gola dhe jam shumë i lumtur dhe i kënaqur me këtë ndeshje. Gjithçka po shkon mirë. Të gjithë më kanë pritur mirë mua. Populli, të gjithë e duan shumë qytetin. Suhareka është vend i qetë. Qëllimi i klubit është të mbyllim sezonin si kampionë, të fitojmë kampionatin. Kupa është gjëja më e rëndësishme për klubin. Sa më përket mua, ambicia ime është të jem golashënuesi më i mirë. Do të përgatitemi për këtë sezon dhe, me ndihmën e Zotit, gjithçka do të shkojë si duhet” tha ai për faqen zyrtare të FFK-së.
