Shtrëngimi i duarve mes ministrit të Mbrojtjes së Kosovës, Shqipërisë e atij të Kroacisë, duke se i pengoi Serbisë.
Kjo pasi që këto tri shtete, nënshkruan të martën një deklaratë për aleancë të përbashkët ushtarake, e cila ka për qëllim rritjen e kapaciteteve ushtarake.
Për këtë, Ministria e Punëve të Jashtme të Serbisë, reagoi duke e quajtur kërcënim për Serbinë.
“Do të injorojmë mesazhin politik të qartë të kësaj iniciative. Është e dukshme se ky memorandum nuk është rezultat i një bashkëpunimi të rastësishëm, por një strategji e synuar për të izoluar Serbinë dhe për të forcuar struktura paramilitare në krahinën jugore të Serbisë, në kundërshtim me të drejtën ndërkombëtare dhe me Rezolutën 1244 të Këshillit të Sigurimit të OKB-së”.
Mirëpo nga ajo çfarë tha një ditë më parë ministri kosovar, Ejup Maqedonci, kjo marrëveshje shërben për të ruajtur paqen dhe sigurinë në rajon.
“Synimi i këtij bashkëpunimi nuk është rast kërcënimi për askënd, është mesazh për ata që synojnë të kërcënojnë rajonin, ne u tregojmë qe jemi së bashku dhe nuk do te lejojmë qe askush të destabilizoi rajonin”, tha Maqedonci.
Eksperti i sigurisë, Drizan Shala konsideron se ky reagim i Beogradit zyrtar erdhi si pasojë e frikës së bashkëpunimit të tri vendeve.
“Në aspektin gjeografik, presidenti Vuçiq dhe qeveria e Serbisë ka reaguar kjo çështje e ka nxitur në atë masë tensione sa që në takimin që do të ketë me sekretarin e NATO-s, presidenti Vuçiq do ta proklamoi këtë çështje edhe do të kërkoi që kjo marrëveshje të tërhiqet”, tha Shala.
Sipas Shalës, kësaj nisme duhet t’i bashkohen edhe shtete të tjera të rajonit.
“Do duhej që vende të tjera t’i bashkohen karvanit të një aleance mini ballkanike e cila është pjesë dhe derivat i politikës euro-atlantike por duke pas për bazë çështjet e tensioneve dhe ndikimit të politikës së Boegradit dhe respektivisht Moskës”.
Ky memorandum i nënshkruar ka për qëllim promovimin e bashkëpunimit në ngritjen e kapaciteteve të mbrojtjes dhe industrisë së mbrojtjes, rritjen e ndërveprueshmërisë përmes edukimit, trajnimit dhe ushtrimeve, kundërveprimit ndaj kërcënimeve hibride dhe forcimin e qëndrueshmërisë strategjike, ofrimin e mbështetjes së plotë për integrimin Euro-Atlantik dhe atë të mbrojtjes rajonale.
