Serbia po vazhdon lobimin kundër Kosovës.
Beogradi zyrtar përmes partnerëve të saj si Rusia dhe vendet të tjera që nuk e njohin Kosovën, vazhdimisht po e pengon republikën të bëhet pjesë e organizatave ndërkombëtare.
Ngjashëm veproi edhe një ditë më parë ku Kosovës iu hoq nga rendi i ditës kërkesa për t’u bërë mysafire speciale në Komitetin për Çështje Politike dhe Demokraci në Asamblenë Parlamentare të Këshillit të Evropës.
Ish-diplomati, Sylë Ukshini thotë se nëse Serbia nuk distancohet nga gjuha armiqësore ndaj Kosovës, dialogu Kosovë-Serbi do të prolongohet edhe për shumë vite të tjera.
“Nëse nuk ulët gjuha armiqësore ndaj Kosovës, nëse nuk ulën pretendimet territoriale ndaj Kosovës ky dialog si ka vazhduar 13 vite, mund të vazhdoi edhe 13 të tjera dhe s’ka asgjë. Sepse, Serbia po tenton që ta mbajë si konflikt të hapur Kosovën dhe mbi këtë bazë unë mendoj që duhet të ndërrohet strategjia e dialogut dhe duhet të ndërrohet qasja jonë”, tha Ukshini.
E njohësi i marrëdhënieve ndërkombëtare, Fitim Mulolli, këto veprime të Beogradit zyrtar i sheh si të qëllimshme në këtë kohë kur ka ndryshime gjeopolitike në botë.
“Vazhdimisht kemi pas ndërhyrje të tilla nga Serbia në rrafshin ndërkombëtar qoftë drejtpërdrejtë qoftë përmes kanaleve të tjera përmes aleatëve të saj si, Rusia, Bjellorusia dhe të tjerë varësisht nga organizatat në të cilat ka qenë temë Kosova apo anëtarësimi i Kosovës. Sidomos në rrethanat e reja gjeopolitike të krijuara pas ndryshimit të politikës amerikane nga z.Trump, ku kemi një mobilizim të Evropës gjërat apo temat siç janë temat rreth Kosovës kalojnë pa marrë vëmendjen e merituar në rrafshin ndërkombëtar”, tha Mulolli.
Mulolli thotë se për ti parandaluar këto akte, shteti duhet të financojë kompani për lobim në botë.
“Përgjithësi këto katër vite qeveria Kurti ka punuar pak në marrëdhëniet me jashtë nuk ka pas angazhim, nuk ka pas investime nuk mund të bësh politikë të jashtme pa lobuar, lobimi kushton, është e pamundur të depërtosh në zyre ku duhet të depërtosh tek njerëzit e caktuar me fuqi vendimmarrëse globale pa pas kontrata lobimi me kompani të mëdha”, tha ai.
Serbia kishte reaguar edhe kur Kosova aplikoi për anëtarësim në KIE.
Kosova dështoi të anëtarësohet në Këshillin e Evropës në fillim të vitit 2024, për shkak se u kushtëzua me krijimin e Asociacionit të komunave me shumicë serbe në Kosovë.
