Ministri i Mbrojtjes së Serbisë, Millosh Vuçeviq prezantoi katër pikat që sias tij do të ishin baza e deeskalimit të situatës në veri.
Aty përfshihen lirimi i serbëve të arrestuar së fundmi, tërheqja e njësive speciale të Policisë së Kosovës nga veriu, formimi i Asociacionit të Komunave me shumicë serbe dhe pjesëmarrja e serbëve në zgjedhjet lokale sepse, siç thotë ai, është në interesin kombëtar të arrihet një zgjidhje politike.
Vuçeviq ka vlerësuar në Instagram se situata në Kosovë është vazhdimisht shumë e vështirë.
“Duhet të flitet nën një çati për lirimin e të gjithë atyre që u arrestuan në mënyrë të paligjshme. Duhet të flitet për tërheqje të menjëhershme të njësive speciale të policisë. Duhet të flitet për formimin e Asociacionit të Komunave serbe. Dhe të flasim për pjesëmarrjen e serbëve në zgjedhjet e vetëqeverisjes lokale. Për mendimin tim, këto janë katër pikat që duhet të jenë themeli i zgjidhjes së kësaj situate, nëse vërtet duam të shkojmë në drejtim të de-përshkallëzimit” theksoi Vuçeviq.
Ai shtoi se është i shqetësuar, sepse sipas tij “lëvizjet e njëanshme të Prishtinës dhe Albin Kurtit përfaqësojnë dhunë”, shkruan Informer, përcjell teve1.info.
“Politika e Albin Kurtit, politika e Qeverisë në Prishtinë, është rrezik i drejtpërdrejtë për sigurinë e Serbisë. Ai në thelb e imponon politikën e tij përmes dhunës dhe lëvizjeve të njëanshme. Prandaj jam i shqetësuar dhe prandaj nuk jam i sigurt se e shoh zgjidhjen me mjete politike dhe Zoti e dhëntë të jetë e mundur, sepse Serbisë i duhet shumë. Interesi ynë jetik kombëtar është të arrihet një zgjidhje politike” tha Vuçeviq.
