Konflikti është një opsion për Serbinë, ka thënë kryeministri serb, Millosh Vuçeviq, lidhur me veprimet e fundit të Kosovës në pjesën veriore të vendit. Kurse, Lista Serbe, ka njoftuar se do t’iu përgjigjen pozitivisht ftesës së Policisë së Kosovës për intervistim në lidhje me pesë institucionet paralele që u mbyllën në veri të vendit.
Autoritetet kosovare kishin mbyllur të premten pesë institucione paralele serbe në veri të vendit.
Sipas burimeve të TËVË1, dy ish-nënkryetarët, Ivan Zaporozhac dhe Igor Simiq u intervistuan sot në stacionin e Policisë në veri të Mitrovicës.
Përfaqësues të Listës Serbe, në një konferencë të jashtëzakonshme për media, treguan për ftesën që kanë marrë nga autoritetet e Kosovës për intervistim dhe thanë se do t’i përgjigjen pozitivisht.
“Nuk është çështja se si do të veprojë nesër Igor Simiqi, Ivan Zaporozhiani, por si do t’ia bëjnë njerëzit të cilëve u shërbyen sa ishim në krye [të institucioneve paralele]. Sa i përket këtyre institucioneve, autoritetet e Kosovës gjithmonë e kanë ditur ekzistencën e tyre. Nuk është asgjë e re që këto institucione kanë ekzistuar në këtë qytet dhe për to është diskutuar në nivel ndërkombëtar, dhe është negociuar në Bruksel se s ido të funksionojnë këto institucione në të ardhmen”, tha Igor Simiq nga Lista Serbe.
Këto veprime sipas Simiq, janë persekutim i popullit serb.
“Përndjekje politike jo vetëm të individëve që kanë udhëhequr institucionet paralele, të cilët janë ftuar për intervistim, por persekutim i popullit serb, pasi institucionet e mbyllura ofronin shërbime për qytetarët”, tha ai.
Mbyllja e institucioneve paralele në veri të vendit, vazhdon të ngjall reagime n= Serbi
Kryeministri i Serbisë, tha se me veprimet e fundit në këtë zonë, Serbia ka si opsion edhe konfliktin.
“Pritet një veprim nervoz i Serbisë. Serbia ka dy opsione, të hyjë në konflikt ose të luftojë politikisht dhe diplomatikisht, sepse gjithçka varet jo vetëm nga Serbia, por edhe nga ata që janë patronët e të ashtuquajturat e pavarësisë së Kosovës, të cilat i mundësojnë Kurtit të ndalojë praktikisht dialogun ndërmjet Beogradit dhe Prishtinës. Atëherë nuk do të kemi problem vetëm me forcat e Kosovës, aty janë edhe KFOR-i dhe NATO-ja, duhet ta kuptojmë gjithë këtë realitet”, tha Vuçeviq.
Pesë institucionet paralele në veri të vendit, që kanë funksionuar me sistem të shtetit serb, u mbyllën në fund të gushtit.
