Për të parin e Serbisë po garojnë 8 kandidatë, përfshirë edhe tri gra. Por gjysma e këtyre kandidatëve për president kanë bindje të forta nacionaliste.
Misha Vaciq, Zdrakvo Ponosh, e Millosh Jovanoviq, që të tre mohojnë pavarësinë e Kosovës dhe kanë qëndrime më radikale se Presidenti aktual Serb, Aleksandër Vuçiq.
Pavarësisht që Serbia synon që një ditë të anëtarësohet në Bashkimin Evropian, disa prej kandidatëve janë të orientuar nga Moska.
E gjitha kjo po i duket si skenar publicistit Dushan Janjiq, i cili thotë se këta kandidatë po e bëjnë Vuciqin të duket i moderuar.
“Në garën për president janë vetëm dy kandidatë më liberale, të tjerët të gjithë janë etno nacionalistë. Më të vërtetë më befasojnë se për çfarë politikash ata flasin. Janë të orientuar nga Rusia ndërsa nuk e pranojnë realitetin në Kosovë. E gjitha më duket si një skenarë, ata e bëjnë Vuciqin të duket me të vërtetë i moderuar”, tha Janjiq.
Ndërkaq, sipas njohësit të çështjeve politike, Belgzim Kamberi, këto kandidatura tregojnë se Serbia është bërë edhe më nacionaliste.
Sipas sondazheve në Serbi, presidenti aktual Aleksandër Vuciq është favorit që ta fitojë edhe një mandat, ndërkaq synimi i opozitës është ta shtyjë atë për nja raund të dytë të garës për të parin e vendit.
Raporti i gazetarit Shpat Blakçori.
