Më 7 qershor, ish-pjesëtar i Njësisë Speciale Operative të Policisë së Kosovës, Arbnor Spahiu u ndalua nga autoritet serbe.
Spahiu në Horgosh të Serbisë u arrestua dhe u dërgua në mbajtje.
Të martën, avokati i familjes Spahiu, Arianit Koci thotë se ai po mbahet në paraburgim nën dyshimin për veprën penale “Vrasje e rëndë”.
Sipas Kocit, kjo ka të bëjë me rastin Banjska.
“Po. Ai dyshohet për veprën penale vrasje e rëndë, e që ka të bëjë me rastin Banjska”, ka thënë Koci.
Por më 23 shtator të vitit 2023, Koci thotë se Spahiu nuk punonte si zyrtar policor.
“Ai në atë kohë, nuk ka punuar fare në polici. Diku rreth 1 vit më herët e ka lëshuar vullnetarisht policinë!”, ka shtuar Koci.
Televizioni ka kërkuar informacione edhe nga Ministria e Punëve të Jashtme dhe Diasporës mirëpo deri në publikimin e këtij lajmi nuk kanë kthyer përgjigje.
