Rezistenca e studentëve serbë kundër presidentit Aleksandër Vuçiq tash e katër muaj është stoike.
Rrugët e Beogradit janë mbushur me protesta masive që nuk i ka parë Serbia që prej rënies së regjimit të Sllobodan Millosheviqit.
Protestuesit një zëri po kërkojnë përgjegjësi për vdekjen e 15 personave nga shembja e një strehe në Stacionin Hekurudhor të Novi Sadit, më 1 nëntor të vitit të kaluar.
Së fundi, si kundërpërgjigje i pari i Serbisë ka thirre ka përkrahësit e tij të mblidhen para Parlamentit në kryeqytetin serb.
E për ta shtuar këtë numër, pjesë e tyre pritet të bëhen edhe serbët e Kosovës.
Rreth 500 qytetarë të komunave veriore, pritet ti organizojë Lista Serbe.
Siç mëson Tëvë1 ata do të paguhen nga 50 euro në ditë për të qëndruar në tenda.
Këto lëvizje të presidentit serb, gazetari nga Serbia, Slobodan Georgev i sheh si alarmuese, pasi thotë që pushteti i tij po lëkundet.
“Ai vazhdimisht trillon gjëra dhe kjo mund të jetë një nga ato trillimet e tija të reja se kinse do të vijnë ata 500 besnikë nga Kosova që ta mbrojnë. Do të mund të bëja shaka dhe ta pyesja nëse janë këta nga ata që kanë mbrojtur Banjskën apo veriun e Kosovës. Pasi kanë “mbrojtur” atë tash do të vijnë ta mbrojnë edhe atë (Vuçiçin) Nuk e di, nuk i besoj kësaj, e shoh që njerëzit këtu në Serbi janë shumë të inatosur. Pushteti i Vuçiqit po fillon të rrënohet ngadalë. Në shumë mjedise në nivelin lokal do të thosha se ka humbur autoritetin. Kjo është kaq. Nuk mund ta mbrojnë atë as 500 besnikë të Kosovës ta mbrojnë nga dëshira e popullit”, ka deklaruar ai.
Madje ai akuzon Listën Serbe duke theksuar se janë nën ombrellën e partisë SNS të Aleksandër Vuçiq.
“Lista Srpska prej kur është bërë është financuar nga Beogradi, të gjithë e dimë këtë. Quhet Lista Srpska, por në fakt është SNS për Kosovë, janë pjesë e të njëjtit aparat. Nuk ka dilemë për këtë. Ata nuk kanë të hyra autonome ose diçka të ngjashme që të vetëfinancohen. Krejt çfarë kanë vjen direkt nga Beogradi, dhe ajo që është e keqe për të gjithë ne është që shpenzohet paraja publike.”
E serbët që pritet të udhëtojnë për t’iu bashkuar protestës në Beograd, mund të ngrisin edhe tensione.
“Shpresoj të mos vijë deri te kjo. Them se më duket se është vetëm edhe një trikë e Vuçiçit për të frikësuar njerëzit. Të thotë “Aha, ju po paralajmëroni protestë të madhe në Beograd, e unë do të sjell serbët e mi nga Kosova të më mbrojnë. Do të mund të bënte përleshje të madhe, por nuk besoj se do të vijë te kjo. Do të thosha se kjo është më shumë llafe e më pak vepra, disi provojnë të frikësojnë njerëzit, dhe shohim si ndodh kjo në publik. Për shembull nëse publiku fillon të flasë shumë për këtë, t’i jap shumë vëmendje, atëherë thonë “shkëlqyeshëm, ky “spin” pati sukses.”
Tëvë1 ka kontaktuar për këtë çështje edhe Listën Serbe, por të njëjtit nuk kanë kthyer përgjigje.
