Profesori nga Britania, Aidan Hehir, e sheh presidentin serb, Aleksandar Vuçiq, si fajtorin kryesor për situatën e krijuar në veri të Kosovës.
Sipas tij, Vuçiq po i shfrytëzon serbët e Kosovës për interesa personale, derisa vendimin për vendosjen e masave të reciprocitetit nga Qeveria Kurti e sheh si një veprim të arsyeshëm.
“Aleksandar Vuçiq po i përdor përfaqësuesit e tij në veri të Kosovës për ta destabilizuar Kosovën. Ai po e pranon se qeveria e re në Kosovë është një forcë e vërtetë për ndryshim dhe që po e sfidon pushtetin e tij. Serbët në veri të Kosovës nuk kanë asgjë për të fituar nga ndërhyrja e Vuçiqit. Ata po përdoren në mënyrë cinike nga Beogradi, i cili si kurrë më parë po tregon interes minimal për fatin e tyre. Qeveria Kurti duhet të lundrojë mes ruajtjes së pavarësisë së saj duke mbetur në marrëdhënie të mira me aleatët e saj të fuqishëm ndërkombëtarë. Pra, shtyrja e zbatimit të rregulloreve të targave ishte vendim i arsyeshëm. Por Kurti duhet të sigurojë që qeveria e tij të mos përkulet ndaj të gjitha kërkesave që vijnë nga jashtë, sepse pastaj nuk do të merret seriozisht si shtet i pavarur”, tha Aidan Hehir, profesor në Westminster University.
Për shkak të mos normalizimit të marrëdhënieve mes Kosovës dhe Serbisë, i gjithë rajoni i Ballkanit mund të rrezikohet.
“Incidentet kufitare janë vetëm një shembull më shumë se si moszgjidhja e vazhdueshme e çështjes së Kosovës, veçanërisht mungesa e normalizimit të marrëdhënieve me Serbinë, kërcënon të minojë stabilitetin në rajon. Në këtë rajon duhet angazhim më i madh ndërkombëtar”, tha Richard Caplan, profesor në Oxford University.
Serbët e Kosovës vunë barrikada në dy pikat kufitare Jarinje e Bërnjak si shenj revolte ndaj vendimeve të Qeverisë së Kosovës, për vendosjen e masave të reciprocitetit në targa të automjeteve dhe në dokumente të udhëtimit. Rrugët u hapen tek pas shtyrjes së zbatimit të këtyre vendimeve për një muaj.
Raporti i gazetarit Shpat Blakçori.
