Vetëm pak metra larg Urës së Ibrit në Mitrovicë të Veriut nisën të mblidhen qytetarët serbë një nga një.
Lokacioni i tubimit nuk ishte i rastësishëm, pasi arsyeja e protestës ishte pikërisht kjo urë.
Mbi 600 protestues serbë nëpërmjet këtyre parullave dolën për të kundërshtuar hapjen e urës për lëvizje.
Thirrjet e tyre i drejtoheshin ndërkombëtarëve e në rendin e parë të protestueseve ishin krerët e Listës Serbe, kryetari Zlatan Elek, zëvendësi i tij Dragisha Miloviq.
Po ashtu ish deputetet e Slavko Simiq dhe ish ministrat, Igor Simiq, Ivan Todosijeviq e Aleksandar Jabllanoviq.
Këtu, protestuesit shprehen haptaz qëndrimin kundër hapjes së urës.
“Nëse Kurti e hap urën, KFOR-i dhe QUINT-i do të jenë përgjegjës”, “Në urë ne mbrojtëm mbijetesën, tani mbrojmë zhdukjen”
E gjatë kësaj proteste, ish – gjyqtari nga Mitrovica e Veriut, Nikolla Kabashiq tha që kjo çështje duhet të rregullohet përmes rrugëve të dialogut, pasi nuk ndihen të sigurt.
“Mjerimi është problemi ynë kolektiv. Ne jemi të sulmuar si popull, ne jemi nën agresion që të largohemi nga Kosova”, tha ai.
E këta protestues përmendën edhe mbylljen e degëve te Postës së Serbisë në Kosovë.
Drejtori i kësaj poste në Kosovë, Ivan Millojeviq thotë se punëtorët e tij padrejtësisht po akuzohen për pastrim parash.
“Unë kam marrë përgjegjësinë përpara punonjësve të mi dhe kam shkruar se unë personalisht duhet të akuzohem. Nëse dikush duhet të shkojë në burg, ai jam unë. Edhe nesër në urë [për të penguar hapjen] ai do të jem unë”, tha ai.
Për mbarëvajtjen e protestës u kujdes Policia e Kosovës.
Ky institucion tha që tubimi ishte i qetë dhe pa provokime.
Edhe KFOR-i ka dalë me një njoftim për protestën e sotme të qytetarëve serbë, të cilën e ka cilësuar si paqësore.
“KFOR nuk do të hezitojë të marrë të gjitha masat e nevojshme për të trajtuar çdo zhvillim që mund të ndikojë në sigurinë dhe stabilitetin rajonal, në përputhje me mandatin e tij të OKB-së”, thuhet mes tjerash në njoftim.
Kjo urë aktualisht është e hapur vetëm për këmbësorë edhe pse në kuadër të dialogut në mes dy shteteve, janë dakorduar që të funksionalizohet edhe për kalimin e automjeteve.
