Një numër i konsiderueshëm i qytetarëve serbë në rrjete sociale kanë shprehur mesazhe nacionaliste ndaj një faqeje e cila promovon Kosovën përmes fotografisë.
Në disa nga komentet në postimet e faqes “Explore Kosovo”, serbët shkruajnë se “Kosova është Serbi”, teksa thonë se shteti i Kosovës nuk është real dhe se është “vjedhur” nga Serbia.
Ndaj këtyre mesazheve kanë reaguar autorët e kësaj faqeje, të cilët i kanë cilësuar këto komente si fyese dhe irrituese.
“Është për të ardhur keq të marrësh komente të tilla fyese dhe irrituese, kjo tregon qartë se disa njerëz nuk do të ndryshojnë kurrë. Kosova është një fakt, është shtet dhe kjo është arsyeja pse unë jetoj këtu dhe do të vazhdoj ta promovoj vendin tim përmes fotografisë. Kosova, vendi i bukurisë dhe i kulturës”, thuhet në reagimin e tyre.
“Çka është Kosova”, “Kosova është Serbi. Ka qenë gjithmonë, është dhe do vazhdojë të jetë. Pikë”, “Serbia jonë e bukur”, “Rezoluta 1244 e OKB-së nuk ka kufizim kohor. Me këtë rezolutë Kosova dhe Metohija janë pjesë e patjetërsueshme e Serbisë. Është dhe do të jetë gjithmonë”, janë disa nga komentet tjera pjesë e postimeve të ndryshme të faqes “Explore Kosovo”. /Teve1.info/