Ka 10 vjet që furrën e bukës, e kanë në qendër të Graçanicës.
E deri më tani, pagesat u kryen kryesisht në dinarë.
Por, së fundmi, bukëshitësit thonë se ka ndryshim.
“Ka pasur një ndryshim që kur është ndaluar dinari, por prej sot ma shumë pagesat po bëhen me euro”, thotë bukëshitësi Sose Karavidaj.
Krejt kjo pasi të dielën ka përfunduar periudha transitore e Bankës Qendrore të Kosovës për dinarin serb.
Nga 13 maji, valuta e vetme në Kosovë, do të jetë euro.
E këtë vendim, e mirëpriten qytetarët serbë të Graçanicës.
Disa prej tyre thonë se nga dinari, ka kohë që kanë hequr dorë.
“Krejt me euro, që 25 vjet me euro jemi krejt, edhe serbët edhe shqiptarët, romët edhe goranët, krejt qytetarë të Kosovës me euro janë, askush s’po e merr dinarin më”, thotë qytetari serb Miodrag Radovanoviq.
“Veç euro, me ble diçka e krejt me euro, çka me bë, derzhavë është tash e Kosovës, jo e Serbisë. Ma mirë me bë qeshtu veç me euro”, tha një tjetër qytetar serb Stanemir Zarkoviq.
Madje këta të moshuar, thonë se kanë gjetur zgjidhje edhe për pensionin që e marrin në Kurshumli të Serbisë.
“Mundesh edhe me euro me marrë (pensionin në Kurshumli të Serbisë), atje me euro po ma dhanë pensionin”, tha ai.
Një tjetër qytetar serb, thotë se konvertimi i valutave, nuk është problem për të.
“Tani gjithçka është me euro. Vajza m’i ka dërguar paratë në franga zvicerane dhe unë i ktheva në euro”, tha një qytetar tjetër.
Ndryshe, në 3 muajt e fundit, janë ofruar informacione për qytetarët serb, rreth zbatimit të rregullores së BQK-së, për pagesa me para të gatshme.
Ndërsa nga e hëna, rregullorja parasheh masa ndëshkuese për ata që përdorin valute tjetër pos euros.
Ndërsa nga BQK për Tëvë1, kanë thënë që së shpejti, do të dalin me një qëndrim zyrtar për këtë çështje.
