Janë duke e vëzhguar situatën vazhdimisht.
Përveç karabinierëve italianë që qëndrojnë gjithmonë mbi Urën e Ibrit, ditëve të fundit vërehet prezencë më e madhe e forcave të EULEXI-it si dhe atyre KFOR-it.
Këto patrullime janë shtuar pasi që qeveria e Kosovës ka paralajmëruar se po përgatiten për hapjen e Urës së Ibrit për qarkullimin e lirë të automjeteve.
E shqiptarët dhe serbët kanë mendime të ndryshme sa i përket hapjes së urës.
Milica Radovanoviq e cila jeton në Mitrovicën e Veriut, gjatë së martës dorëzoi një letër tek karabinierët e italian me qëllimin që kjo letër të mbërrij në duart e komandantit të KFOR-it.
Përmes kësaj letre ajo së bashku me disa gra të tjera po e kundërshtojnë idenë e hapjes e Urës Ibrit për lëvizjen e automjeteve.
“Letra që po ia dorëzojmë karabinierëve, e që është për komandantin e KFOR-it, është mënyra më e mirë për të shprehur të gjitha brengat në një copë letre. Mendoj që ia kemi dalë me sukses t’i përmbledhim, sepse këtë letër, për vetëm një ditë e kanë përkrahur 415 gra nga katër komunat në veri. Nga komandanti i KFOR-it, kërkojmë veprim të vendosur dhe sinjal të qartë që asnjë lloj i interesave politike nuk do të kalojë interesat e qytetarëve të cilët tash në shumicë janë kundër hapjes së urës”, tha Milica Radovanoviq, qytetare
E përfaqësuesja nga Iniciativa e Re Sociale, Milica Andriq- Rakiq , thotë se ura duhet të hapet kur të dy komunitet shprehin gatishmëri për këtë.
“Konsideroj se ura duhet të hapet kur të dy komunitetet shprehin gatishmëri për këtë gjë, por siç po e shihni momentalisht nuk janë të gjitha palët të gatshme. Ka pasur momente shumë më të mira në të kaluarën që ura të hapej, tani situata është shumë më e keqe”, thotë ajo
As Mira Kastiqit nuk po i pëlqen kjo ide.
“Jo, jo assesi nuk duhet të hapet ura tani, thotë kjo qytetare.
E disa nga banorët serbë në veri nuk janë fare te interesuar për këtë temë.
“Ne nuk dimë asgjë, askush nuk na pyet” – qytetare
Ndërsa ndryshe mendon analisti politik, Branislav Kërstiq.
“Kjo urë është simbol i trazirave, ndarjeve, incidenteve si dhe vrasjeve. Sipas mendimit tim kjo urë duhej të hapej kohë më parë për shqiptarët dhe serbët. Konsideroj se është koha e fundit për të kontribuar pozitivisht për marrëdhënie më të mira ndër-etnike, andaj kjo urë duhet të hapet”, ka thënë Branisalv Kërstiq.
Kurse, Miroslav Lakitiq thotë se ura assesi nuk duhet të shërbej si arsye që shqiptarët dhe serbët të ndahen.
“Por duhet të ketë marrëveshje me shoqërinë serbe në Kosovë. Ura nuk është për të ndarë njerëzit, por për të bashkuar. Ura nuk duhet të jetë arsye mes shqiptarëve dhe serbëve. Nuk duhet të bëhet dramë e madhe, ura edhe ashtu funksionon, përpos trafikut. Këtë shëtitore nuk duhet lëshuar për trafik sepse këtu duhet të shëtitemi. E ura të lëshohet për automjete, mundet, vetëm se nuk duhet të kalojnë nëpër qendër për shkak të popullit, sepse ka shëtitore. Përndryshe s’kam asgjë kundër. Është në interesin e dikujt të bëjë probleme pa pasur problem. Mendoj që kjo është në interes, fatkeqësisht, edhe Beogradit, edhe Prishtinës. Kështu, ato lëkundin popullin e tyre, edhe Beogradi, edhe Prishtina”, shprehet ky qytetar
E shqiptarët thonë se ka ardhur momenti që të hapet kjo urë.
“Ura duhet të hapet patjetër dhe këtë e dinë të gjithë. Kur ura është e mbyllur atëherë ka rrezik. Hapja e urës simbolizon vetëm paqen”, shprehet Fejza Brahimi- qytetar
“Shumë më herët do duhej të hapej Ura e Ibrit sepse kjo është urë lidhëse për të dyja komunitetet”, thotë Halil Mehmeti.
Vendet e QUINT-it – SHBA, Britania e Madhe, Gjermania, Franca dhe Italia kanë deklaruar se nuk e mbështesin hapjen e urës në këtë moment.
