Senatori amerikan, Chris Murphy postoi në X se ai dhe senatorë të tjerë morën një informim të klasifikuar javën e kaluar nga zyrtarë të inteligjencës, të cilët treguan se Irani nuk përbënte një kërcënim të menjëhershëm përmes programit të tij bërthamor.
“Irani nuk ishte afër ndërtimit të një arme bërthamore të gatshme për t’u prodhuar”, tha Murphy. “Negociatat që Izraeli i prishi me sulmet e tyre kishin potencialin për sukses.”
Kujtojmë se ditë më parë, inteligjenca amerikane doli me njoftimin se, Irani jo vetëm që nuk po punon në mënyrë aktive për një bombë, por do të duheshin deri në tre vjet për ta ndërtuar dhe dorëzuar një të tillë, nëse vendos të ndjekë atë rrugë.
Në kundërshtim më këtë, më 13 qershor, ndërsa Izraeli nisi një seri sulmesh ajrore ndaj objektivave iraniane, ai lëshoi gjithashtu paralajmërime të ashpra në lidhje me programin bërthamor të Iranit, duke pretenduar se sulmet ishin të nevojshme për të parandaluar Teheranin të pajiset me armë bërthamore.
Mëngjesin e hershëm të së dielës, me po të njëjtin arsyetim, ushtria amerikane kreu sulme masive me precizion të lartë brenda territorit iranian, në tre objektet kryesore bërthamore të tyre: Fordow, Natanz dhe Isfahan./teve1/
