Kandidati për deputet nga Lidhja Demokratike e Kosovës, Driton Selmanaj, ka thënë se nëse kjo parti vjen në krye të qeverisë do ta shtrijë sovranitetin e plotë në veri në koordinim me ndërkombëtarët.
Ai ka thënë se shtrimi i sovranitetit në atë pjesë të vendit është çështje politike e jo policore.
I pyetur në emisionin “InfoNata” në Tëvë1 edhe për kërkesën e ndërkombëtarëve për largimin e Njësisë Speciale nga veriu, ai ka thënë se LDK në koordinim me ndërkombëtarët do ta shtrijnë sovranitetin e plotë.
“Ne do të koordinohemi me ta dhe do ta shtrijmë sovranitetin në kuptimin e plotë të fjalës, duke i bërë që serbët e Kosovës, në Kosovë të ndihen si në shtëpinë e tyre. Çdo kërkesë që është në funksion të shtrimit të sovranitetit dhe fuqizimit të subjektivitetit tonë ndërkombëtar do ta bëjmë. LDK nuk do ta bëjë atë që e ka bërë kjo qeveri, ditën kinse i ka dërguar policinë atje dhe më pas shkon dhe e nënshkruan Marrëveshjen e Brukseli dhe Ohrit për vendosjen e autonomisë territoriale të Serbisë”, ka thënë Selmanaj në emisionin “InfoNata”.
Ai ka thënë se autoriteti civil nënkupton shtrimin e sovranitetit.
Duke folur për veprimet e qeverisë në veri ai ka thënë se situata atje është momentale, por ka thënë se e mira është që grupet kriminale nuk funksionojnë më.
