Deputeti nga radhët e Lidhjes Demokratike të Kosovës, Driton Selmanaj, ka kërkuar vëmendje nga institucionet e Kosovës pas arrestimit të ish-luftëtarit të UÇK-së, Hasan Dakaj nga policia serbe, raporton teve1.info
Gjatë seancës plenare të Kuvendit të Kosovës, Selmanaj ka thënë se janë bërë më shumë se një muaj prej kur ish-luftëtari i UÇK-së është arrestuar nga policia serbe në Merdarë, derisa e ka quajtur të pakuptimtë siç ka thënë Selmanaj mungesën e përkushtimit të institucioneve të Kosovës për ta liruar Dakajn.
“Informatat e familjarëve, të siguruara nga avokati i caktuar nga gjykata e Serbisë, tregojnë se ai po mbahet në burgun e sigurisë së lartë në Beograd. Nga regjimi dhe autoritetet në Serbi po akuzohet për krime lufte në Kosovë. Është e papranueshme dhe e pakuptimtë mungesa e përkushtimit të bartësve të institucioneve të Kosovës për lirimin e Hasanit. Është folur dy ditë pas arrestimit të tij dhe nuk është ndërmarrë asgjë”, ka thënë Selmanaj.
