Selektorii i Sllovakisë, italiani Francesco Calzona, ka folur sërish për ndeshjen e 26 marsit ndaj Kosovës.
Calzona ishte në ceremoninë e shpalljes së më të mirëve në sportin e Sllovakisë.
Sllovakia u rendit e treta në mesin e ekipeve më të mira, ku Stanislav Lobotka u rendit i dyti prej sportistëve, ndërsa David Hancko i treti.
Calzona është ndarë i kënaqur me këto çmime, ndërsa ndër të tjera foli edhe për ndeshjet e plejofit për kualifikim në Kupën e Botës në futboll.
Sllovakia e Kosova përballen në Bratislavë më 26 mars. Fituesi i kësaj ndeshjeje më 31 mars e pret fituesin e ndeshjes Turqi – Rumani, në finale të plejofit.
Dhe përfaqësuesja që e fiton finalen kualifikohet në Botëror.
Calzona ka theksuar që kualifikimi në Botëror është ëndrra e të gjithë sllovakëve.
“Na duhet që të gjithë lojtarët të jenë të gatshëm. Disa prej lojtarëve momentalisht kanë probleme. Besoj se do të jenë mirë në mars, pasi na duhet ekipi i kompletuar. E dimë se me çfarë vështirësish jemi përballur në kualifikime. Besoj se të gjithë do të jenë të shëndetshëm dhe të gatshëm për të luftuar për synimin tonë”, ka thënë Calzona, shkruan të martën sajti zyrtar i Federatës së Futbollit të Sllovakisë.
Kapiteni i Sllovakisë, Milan Shkriniar, po ashtu ka vlerësuar vendin e tretë.
Ai beson që përfaqësuesja sllovake e futbollit do të ketë edhe më shumë suksese në vitin 2026.
Për herë të parë në Sllovaki dy futbollistë kanë zënë vend në treshen më të mirë të sportistëve të vitit. Dhe kjo është vlerësuar shumë në mediat sllovake.
Lobotka është bashkëlojtar i Amir Rrahmanit te Napoli. Ndërkohë David Hancko është pjesë e rëndësishme e Atletico Madridit.
