Policia e Kosovës ka konfiskuar dy armë zjarri dhe municion pas një incidenti të raportuar me të shtëna në fushat e fshatit Muradem, në komunën e Prizrenit.
Sipas njoftimit zyrtar, dy persona janë ndaluar dhe janë vënë në pranga pas tentativës për të larguar nga vendngjarja.
Ngjarja thuhet se ka ndodhur rreth orës 22:10, kur Policia e Kosovës mori një informacion për të shtëna me armë zjarri në këtë zonë.
Menjëherë pas pranimit të informatës, patrullat policore janë nisur drejt vendit të ngjarjes dhe kanë arritur të ndalojnë një automjet në të cilin ndodheshin dy persona, të cilët po tentonin të largohet nga zona.
Gjatë kontrollit të automjetit dhe të dyshuarve, policia ka gjetur dhe sekuestruar dy armë zjarri – pistoleta, si dhe disa pako me municion.
Hetuesit dhe njësia e forenzikës kanë dalë në vendngjarje për të kryer hetime dhe për të dokumentuar rastin, duke realizuar fotografimin e vendit dhe sekuestrimin e armëve, municionit dhe gëzhojave.
Po ashtu, është sekuestruar edhe automjeti i përfshirë në rast.
Për rastin është njoftuar Prokurori i Shtetit, i cili ka urdhëruar iniciimin e procedurës penale dhe ndalimin e të dyshuarve për një periudhë prej 48 orësh.
“Policia e Kosovës mbetet e përkushtuar në garantimin e sigurisë së qytetarëve dhe parandalimin e veprimtarive të kundërligjshme”, theksohet në njoftim.
