Policia e Kosovës ka njoftuar se ka sekuestruar narkotikë dhe dëshmi tjera në një shtëpi në fshatin Rekë në Mitrovicë të Jugut.
Sipas njoftimit gjatë kontrollit, si prova materiale janë sekuestruar 8 qese me substancë të dyshuar narkotike të llojit kokainë, me peshë totale prej 8.8 gram, 75 qese me substancë narkotike të llojit marihuanë, me peshë totale prej 106.3 gram, 17 fara të bimëve narkotike Kanabis Sativa, 8 fishekë të kal. 7.92×57, 1 peshore digjitale, 1 mulli për bluarjen e marihuanës, si dhe 1 mijë e 10 euro para të gatshme.
Po ashtu bëhet e ditur se i dyshuari gjatë kontrollit nuk ka qenë i pranishëm në shtëpi, por i është lënë ftesë që të paraqitet në Polici për t’u marrë në pyetje.
“Lidhur me këtë rast, është informuar Prokurori Kujdestar pranë Prokurorisë Themelore në Mitrovicë – Departamenti i Krimeve të Rënda. Hetimi për këtë rast është duke u kryer nga antidroga Mitrovicë-Jug”, thuhet në njoftimin e Policisë.
