Njësia e hetimeve policore në Shtërpcë, në bashkëpunim me njësinë “Qendra” në Prishtinë, ka kryer një kontroll në një vilë në Brezovicë, pas dyshimeve për posedim të armëve.
Sipas njoftimit të policisë, gjatë kontrollit janë gjetur dhe sekuestruar:
“Një pushkë automatike, dy pushkë ajrore, pesë karikatorë për pushkë automatike dhe njëzetë e një copë fishekë të kalibrave të ndryshëm.”
Policia ka bërë të ditur se lidhur me rastin është njoftuar prokurori i shtetit, ndërsa rasti është inicuar si:
“Mbajtje në pronësi, kontroll ose posedim i paautorizuar i armëve” dhe është proceduar më tej sipas procedurave ligjore.
Megjithatë, i dyshuari nuk është gjetur në vendngjarje dhe mbetet në kërkim nga autoritetet.
“I dyshuari nuk është gjetur në momentin e kontrollit dhe është në kërkim nga policia”, thuhet në njoftim.
Hetimet vazhdojnë dhe policia po punon për kapjen e personit të dyshuar dhe zbardhjen e plotë të këtij rasti.
