Inspektorati Qendror i Mbikëqyrjes së Tregut (IQMT), në bashkëpunim me Prokurorinë e Shtetit, Policinë dhe Doganën, ka zhvilluar të premten një aksion të gjerë kontrolli te bizneset që tregtojnë metale të çmuara në rajonin e Pejë, duke sekuestruar gjithsej 45 kilogramë ari, vlera e të cilit në bursën ndërkombëtare arrin rreth 7 milionë euro.
Sipas Ministrisë së Industrisë, Ndërmarrësisë, Tregtisë dhe Inovacionit, qëllimi i këtij operacioni ishte të verifikonte ligjshmërinë e tregtimit, origjinën e metaleve të çmuara dhe respektimin e standardeve teknike sipas legjislacionit në fuqi.
Gjatë kontrolleve, inspektorët evidentuan shkelje të rënda ligjore.
IQMT-ja ndaloi mbi 20 kg ari të paverifikuar dhe pa shenjëzim nga Agjencia e Metrologjisë së Kosovës, të cilat do të mbeten të bllokuara deri në përfundimin e procedurave ligjore. Po ashtu, u sekuestruan mbi 25 kg punime ari dhe metale të tjera të çmuara, për të cilat operatorët ekonomikë nuk mundën të paraqisnin dokumentacionin e duhur mbi prejardhjen.
IQMT-ja paralajmëron se tregtimi i metaleve të çmuara pa shenjëzim dhe dokumentacion të rregullt konsiderohet shkelje e rëndë dhe ndëshkueshme, ndërsa kontrollet do të vazhdojnë në të gjithë Kosovën me intensitet të lartë dhe çdo parregullsi do të ndëshkohet sipas ligjit.
