Sekretari amerikan i Shtetit, Marco Rubio ka arritur në Izrael të dielën, disa ditë pas sulmeve izraelite në Doha të Katarit dhe ndërsa sulmet izraelite në Gaza janë intensifikuar fuqishëm.
Rubio deklaroi para vizitës se do të kërkojë përgjigjjë nga zyrtarët izraelitë se si e shohin rrugën më tutje në Gaza,pas sulmeve izraelite në Katar javën e kaluar të cilat penguan përpjekjet për arritjen e ndonjë marrëveshjeje të mundshme për përfundimin e luftës.
Sekretari amerikan tha një ditë para takimit se sulmi i Izraelit ndaj Katarit, që synonte anëtarët e Hamasit, nuk do të shkaktojë ndonjë ndryshim në marrëdhëniet midis Tel Avivit dhe Uashingtonit.
Vizita e tij dy-ditore është gjithashtu një shfaqje mbështetjeje për Izraelin gjithnjë e më të izoluar, ndërsa Kombet e Bashkuara zhvillojnë atë që pritet të jetë një debat i diskutueshëm mbi angazhimin për krijimin e një shteti palestinez, shkruan Associated Press.
Kryeministri izraelit Benjamin Netanyahu kundërshton fuqimisht njohjen e një shteti palestinez.
Të premten, Rubio dhe Trump u takuan poashtu me kryeministrin e Katarit për të diskutuar pasojat e operacionit izraelit.
Sulmi në Doha duket se i ka dhënë fund përpjekjeve për të siguruar një armëpushim midis Izraelit dhe Hamasit dhe për të liruar pengjet përpara seancës së ardhshme të Asamblesë së Përgjithshme të OKB-së, në të cilën lufta në Gaza pritet të jetë një fokus kryesor.
