Për herë të parë që nga paslufta, në komunën e Mitrovicës së Veriut, Kuvendi Komunal ka mbajtur seancë solemne për nder të 16-vjetorit të Pavarësisë së Kosovës. Në tri komunat tjera veriore nuk pati organizime, ndërsa nga Policia kanë bërë të ditur se gjithçka ka shkuar qetë.
U mblodhën bashkë të shtunën.
Fillimisht u lëshua himni i flamurit të Republikës.
Për herë të parë nga paslufta, Kuvendi Komunal i Mitrovicës së Veriut mbajti një seancë solemne në nder të Pavarësisë së Kosovës.
Pjesë e kësaj seance ishin asamblistët komunalë edhe nga radhët e komunitetit jo shumicë.
Nismëtari i kësaj seance, vlerësoi lartë sakrificën e qytetarëve.
“Në periudhën 16-vjeçare, pjesa veriore është sakrifikuar për mbrojtjen e sovranitetit dhe na kurrë nuk do ta harrojmë sakrifikimin e popullatës se jemi mësuar për ditë, se shteti don përkushtim andaj edhe ndjejmë obligim, andaj jemi të obliguar ti kryejmë obligimet që i kemi ndaj qytetarëve tanë”, tha kryesuesi i Kuvendit Komunat të Mitrovicës së veriut, Nexhat Ugljanin.
E kryetari i kësaj komune, Erden Atiq tha se gjatë vitit 99-të, Kosova u ballafaqua me dëbime e masakra, por nuk u dorëzua.
“Kosova përjetoi dhunën, dëbimin dhe masakrën por nuk u thye. Intervenimi i NATO-së në pranverën 99, ishte një ngjarje madhështore në historinë e njerëzimit. Vlerat morale dhe parimet e të drejtave njerezore triumfuan mbi doktrinën e sovranitetit shtetërorë”, tha kryetari i Mitrovicës së veriut, Erden Atiq.
Ndryshe nga komuna e Mitrovicës së veriut, në komunat e tjera veriore, Zubin Potok, Zveçan dhe Leposaviq nuk pati ndonjë aktivitet.
Por, kryetari i Zveçanit, Ilir Peci tha për TËVË1, se në komunën e tij, kanë festuar një ditë para.
“Dje kemi festuar, do të thotë ka qenë një numër i madh i qytetarëve shqiptar, kemi bërë vizitë në Prekaz, te varreza e heroit kombëtar, Isa Boletini”, tha kryetari i Zveçanit, Ilir Peci.
Ndërsa, për situatën në veri dha detaje zëvendësdrejtori i Policisë për Rajonin e veriut, Veton Elshani.
“Policia e Kosovës vazhdimisht ka plane operative që punon për raste të ndryshme, ose festë fetare ose si sot që është kjo festë. Edhe kjo nuk përjashton, policia ka plane të veta për çdo ditë për çdo natë, mbrëmë, sonte, kemi plane operative të cilat i punojmë edhe që pres t’i zbatojmë në terren, çdo ditë mbrëmë dhe sonte do jemi në rrugët e veriut të vendit”, u shpreh zëvendësdrejtori i Policisë së Kosovës, Veton Elshani.
Tëvë 1 ka tentuar të marrë deklaratë edhe nga qytetarët e komunitetit serb, por të njëjtit nuk kanë pranuar të flasin për televizionin.
