Gjykata Ndërkombëtare e Drejtësisë në Hagë po mban seancë dëgjimore në lidhje me detyrimin e Izraelit për të lehtësuar ndihmën humanitare për palestinezët në Gaza dhe Bregun Perëndimor të pushtuar.
Asaj i është drejtuar ambasadori palestinez në Holandë, Ammar Hijazi, me argumente gojore të hënën, ku tha se po qëndron në emër të njerëzve të persekutuar që luftojnë për të mbijetuar në Gaza.
Hijazi akuzoi Izraelin për shkelje të ligjit ndërkombëtar në territoret e pushtuara, shkruan AP.
“Izraeli po vret nga uria, po vret dhe po zhvendos palestinezët, ndërkohë që synon dhe bllokon organizatat humanitare që përpiqen të shpëtojnë jetën e tyre”, tha ai në gjykatë.
Seancat janë përqendruar në një kërkesë të vitit të kaluar nga Asambleja e Përgjithshme e OKB-së, e cila i kërkoi gjykatës të peshonte mbi përgjegjësitë ligjore të Izraelit pasi vendi bllokoi agjencinë e OKB-së për refugjatët palestinezë që të vepronte në territorin e tij.
Nënsekretarja e Përgjithshme e OKB-së për Çështjet Ligjore, Elinor Hammarskjöld tha se “masat e marra nga fuqia pushtuese për të garantuar sigurinë e saj duhet të ushtrohen në një mënyrë që nuk do t’i mohojë organizatave të paanshme humanitare si Kombet e Bashkuara aftësinë për të kryer skema ndihme”.
Seancat dëgjimore u hapën pasi sistemi i ndihmës humanitare në Gaza po shkon drejt kolapsit . Izraeli ka bllokuar hyrjen e ushqimit, karburantit, ilaçeve dhe furnizimeve të tjera humanitare që nga 2 marsi.
Ai rinovoi bombardimet e tij më 18 mars, duke thyer armëpushimin dhe pushtoi pjesë të mëdha të territorit, duke thënë se synon të shtyjë Hamasin të lirojë më shumë pengje.
Hamasi ka pranuar të lirojë të gjitha pengjet në këmbim të një armëpushimi të përhershëm dhe lirimin e të burgosurve palestinezë, gjë të cilën Izraeli e ka refuzuar.
Programi Botëror i Ushqimit tha javën e kaluar që rezervat e tij ushqimore në Rripin e Gazës kanë mbaruar, duke i dhënë fund një burimi kryesor të ushqimit për qindra mijëra palestinezë, pasi shumë familje po luftojnë për të ushqyer fëmijët e tyre .
Në total, në seancat dëgjimore ne Hagë janë planifikuar të marrin pjesë 40 shtete dhe katër organizata ndërkombëtare. ShBA është planifikuar të flasë të mërkurën.
Gjykata ka të ngjarë të marrë muaj për të vendosur. Ekspertët thonë se vendimi, megjithëse jo ligjërisht i detyrueshëm, mund të ndikojë thellësisht në jurisprudencën ndërkombëtare, ndihmën ndërkombëtare për Izraelin dhe opinionin publik.
